Volkswagen of America — Germaniyaning Volkswagen avtomobilsozlik kompaniyasining Amerikadagi bo‘limi, may oyida rasmiy ravishda o‘z nomini Voltswagen of America deb o‘zgartirmoqchiligi haqida ma’lum qildi, deb yozadi Meduza kompaniya veb-saytiga tayanib.
Yangi nom elektr kuchlanishi o‘lchov birligini anglatadigan “volt” atamasidan kelib chiqqan bo‘lib, u kompaniyaning elektromobillar ishlab chiqarishga yo‘naltirilganini aks ettirishi aytilgan.
“Voltswagen — bu shunchaki nomni o‘zgartirish emas, balki kompaniyaning ommaga kelajakda elektromobillarni rivojlantirishga qo‘shadigan hissasi to‘g‘risida ma’lum qilishidir”, — deyilgan kompaniya xabarida.
Kompaniyaning qayd etilishicha, reklama, veb-sayt va ijtimoiy tarmoqlarda Volkswagen’ning Amerikadagi bo‘limi uchun Voltswagen nomidan foydalaniladi. Bundan tashqari, kompaniya ishlab chiqaradigan elektromobillarga Voltswagen so‘zi yozilgan havorang emblema beriladi. Yoqilg‘i bilan yuradigan avtomobillar eski nomini saqlab qolgan holda VW qisqartmasi bilan havorang emblemani olishi aytilgan.
Keyinchalik Volkswagen kompaniyasi vakili The Wall Street Journal gazetasiga bergan intervyusida Volkswagen of America nomining o‘zgartirilishi haqidagi ma’lumot 1-aprel hazili va shu bilan birga kompaniya elektromobillariga omma e’tiborni jalb qilishga qaratilgan marketing hiyla-nayrangi ekanini ma’lum qilgan.
Ma’lumot uchun Volkswagen dunyodagi eng yirik elektromobillar ishlab chiqaruvchisi bo‘lish rejasini e’lon qilgan edi. 2020-yilda kompaniya 231 mingta elektromobil ishlab chiqardi — bu undan oldingi yilga nisbatan uch baravar ko‘p. Volkswagen 2030-yilga qadar 70 xil modeldagi elektromobil va 60 xil gibrid modellar ishlab chiqarishni yo‘lga qo‘yishni va 2050-yilga kelib uglerod neytralligiga erishishni rejalashtirmoqda.
Izoh (0)