Toshkent shahrida Cobalt va Lacetti to‘qnashuvi natijasida faqat haydovchi halok bo‘lgani haqida xabar berilgandi. Tergov departamentining ma’lum qilishicha, ushbu YTH sabab bir emas, ikki shaxs vafot etgan.
Ma’lum qilinishicha, 27-mart kuni soat 15:30 larda Mirzo Ulug‘bek tumanidagi shu nomli ko‘chada 43 yoshli D.K. yo‘lning sirpanchiq ekani sabab Cobalt rusumli avtomashinasi boshqaruvini yo‘qotib, beton to‘siqqa urilgan. Oqibatda mashina qarama-qarshi yo‘nalishga o‘tib ketgan va 31 yoshli S.R. boshqarib ketayotgan Lacetti bilan to‘qnashgan.
To‘qnashuv oqibatida Lacetti haydovchisi va shu mashinada yo‘lovchi sifatida ketayotgan 33 yoshli ayol vafot etgan. 25 yoshli yana bir yo‘lovchi og‘ir tan jarohati olib, shifoxonaga yotqizilgan.
Holat yuzasidan Jinoyat kodeksining 266-moddasi 2-qismida (transport boshqarish qoidalarini buzish) nazarda tutilgan huquqbuzarlik bo‘yicha jinoyat ishi qo‘zg‘atilgan. Hozirda tergov harakatlari olib borilmoqda.
Bundan avval Navoiyda yo‘lni kesib o‘tayotgan mast piyodani Damas urib ketgani, Qarshida ikki nafar piyodani urib yuborib, voqea joyidan ketib qolgan Сobalt haydovchisi 15 sutkaga qamalgani hamda Samarqandda “ZIL” yuk mashinasi bilan to‘qnashgan Damas haydovchisi voqea joyida halok bo‘lgani haqida xabar berilgandi.
Izoh (0)