Qashqadaryo viloyatining Qarshi shahrida piyodalar yo‘lakchasida harakatlanib ketayotgan ikki nafar fuqaroni urib yuborib, ularga birinchi yordam ham ko‘rsatmay, voqea joyidan ketib qolgan Сobalt haydovchisi 15 sutkaga qamaldi. Bu haqda “Daryo”ga Qarshi shahar YHXB inspektori Ahror Usmonov xabar berdi.
Ta’kidlanishicha, voqea 2021-yilning 19-mart kuni soat 15:20 da Qarshi shahar Islom Karimov ko‘chasidagi piyodalar yo‘lakchasida sodir bo‘lgan.
Haydovchi N.Sh. boshqaruvidagi Cobalt Islom Karimov ko‘chasida harakatlanayotganda, “Samsung savdo do‘koni” ro‘parasidagi piyodalar o‘tish yo‘lakchasida Yo‘l harakati qoidalarining 109-bandi (tartibga solinmagan piyodalar o‘tish joyiga yaqinlashayotgan transport vositasining haydovchisi qatnov qismini kesib o‘tayotgan piyoda(lar)ni o‘tkazib yuborish uchun tezligini kamaytirishi yoki to‘xtashi shart)ga amal qilmasdan B.D. va B.M.ni urib yuborgan. Oqibatda fuqarolar turli tan jarohatlari olib, Respublika shoshilinch tez tibbiy yordam ilmiy markazining Qarshi fillialiga yotqizilgan.
Voqea joyidan ketib qolgan Cobalt haydovchisi esa Qarshi shahar YHXB xodimlari sa’y-harakati bilan topilgan. Holat yuzasidan fuqarolar sudga oid tibbiy ekspertizadan o‘tkazilganda sudga oid tibbiy ekspertiza xulosasiga ko‘ra, B.D. va B.M. yengil tan jarohati olgan.
Qarshi shahar YHXB xodimlari tomonidan dastlabki surishtiruv harakatlari olib borilib, tegishli tartibda hujjatlar rasmiylashtirilgan va to‘plangan hujjatlar Jinoiy ishlar bo‘yicha Qarshi shahar sudiga yuborilgan. Sud haydovchini aybdor deb topib, unga nisbatan 15 sutka ma’muriy qamoq jazosini tayinlagan.
Avvalroq Namanganda “Jiguli” 3 yoshli bolani urib ketgani, bola shifoxonada vafot etgani, Toshkentda esa 60 yoshli ayol yuk mashinasi urib ketishi oqibatida halok bo‘lgani xabar qilingandi.
Izoh (0)