Qashqadaryo viloyatining Qarshi tumanida Matiz va Damas avtomobillari to‘qnashdi. Oqibatda uch kishi jarohat olib, shifoxonaga yotqizildi, deya xabar berdi “Daryo” muxbiri.
Ma’lum bo‘lishicha, YTH 26-mart kuni soat taxminan 15:00 da sodir bo‘lgan.
Voqea joyida “Daryo” muxbiri bilan suhbatlashgan viloyat IIB Yo‘l harakati xavfsizligi boshqarmasi axborot xizmati rahbari Javlon Baxtiyevning aytishicha, holat Qarshi tuman IIB tergovchilari tomonidan o‘rganilmoqda.
“YTH aynan qaysi avtomobil haydovchisining aybi bilan sodir bo‘lgani hozircha bizga ham ma’lum emas. Ammo holat o‘rganilmoqda”, — deydi Javlon Baxtiyev.
Voqea joyida bo‘lib turgan YPX inspektorlarining aytishicha, Damas’ni ayol haydovchi boshqargan bo‘lib, YTH natijasida uning oyoqlarini pachaqlangan mashina temiri siqib qo‘ygan.
“Biz uch nafar jabrlanuvchini shifoxonaga jo‘natdik. Matiz va Damas to‘qnashgani sabab har ikkala haydovchining ham oyoqlarini temir siqib qo‘ygan”, — deydi “Daryo” muxbiri bilan suhbatlashgan YPX xodimi.
Avvalroq Qashqadaryoda to‘y kuni kuyovning otasi va ikki qarindoshi hamda kelinning xolasi YTHga uchrab, halok bo‘lgani haqida xabar berilgandi. Mavzuga doir:- Samarqandda Mercedes-Benz yuk mashinasi haydovchi boshqaruvni yo‘qotishi oqibatida ag‘darildi
- Toshkentda 60 yoshli ayol yuk mashinasi urib ketishi oqibatida halok bo‘ldi
- Jizzaxda maxsus harbiy avtomobil, Nexia-2 va Damas ishtirokida YTH sodir bo‘ldi. Ikki nafar harbiy xizmatchining qovurg‘asi singan
