Қашқадарё вилоятининг Қарши шаҳрида пиёдалар йўлакчасида ҳаракатланиб кетаётган икки нафар фуқарони уриб юбориб, уларга биринчи ёрдам ҳам кўрсатмай, воқеа жойидан кетиб қолган Сobalt ҳайдовчиси 15 суткага қамалди. Бу ҳақда «Дарё»га Қарши шаҳар ЙҲХБ инспектори Аҳрор Усмонов хабар берди.
Таъкидланишича, воқеа 2021 йилнинг 19 март куни соат 15:20 да Қарши шаҳар Ислом Каримов кўчасидаги пиёдалар йўлакчасида содир бўлган.
Ҳайдовчи Н.Ш. бошқарувидаги Cobalt Ислом Каримов кўчасида ҳаракатланаётганда, «Samsung савдо дўкони» рўпарасидаги пиёдалар ўтиш йўлакчасида Йўл ҳаракати қоидаларининг 109-банди (тартибга солинмаган пиёдалар ўтиш жойига яқинлашаётган транспорт воситасининг ҳайдовчиси қатнов қисмини кесиб ўтаётган пиёда(лар)ни ўтказиб юбориш учун тезлигини камайтириши ёки тўхташи шарт)га амал қилмасдан Б.Д. ва Б.М.ни уриб юборган. Оқибатда фуқаролар турли тан жароҳатлари олиб, Республика шошилинч тез тиббий ёрдам илмий марказининг Қарши филлиалига ётқизилган.
Воқеа жойидан кетиб қолган Cobalt ҳайдовчиси эса Қарши шаҳар ЙҲХБ ходимлари саъй-ҳаракати билан топилган. Ҳолат юзасидан фуқаролар судга оид тиббий экспертизадан ўтказилганда судга оид тиббий экспертиза хулосасига кўра, Б.Д. ва Б.М. енгил тан жароҳати олган.
Қарши шаҳар ЙҲХБ ходимлари томонидан дастлабки суриштирув ҳаракатлари олиб борилиб, тегишли тартибда ҳужжатлар расмийлаштирилган ва тўпланган ҳужжатлар Жиноий ишлар бўйича Қарши шаҳар судига юборилган. Суд ҳайдовчини айбдор деб топиб, унга нисбатан 15 сутка маъмурий қамоқ жазосини тайинлаган.
Аввалроқ Наманганда «Жигули» 3 ёшли болани уриб кетгани, бола шифохонада вафот этгани, Тошкентда эса 60 ёшли аёл юк машинаси уриб кетиши оқибатида ҳалок бўлгани хабар қилинганди.
Изоҳ (0)