Toshkentda yo‘lning notekisligi sabab ikkita Matiz to‘qnashib ketdi, deya xabar bermoqda YHXBB.
Qayd etilishicha, 2021-yilning 30-mart kuni soat 14:00 larda Yakkasaroy tumani Shota Rustaveli ko‘chasida joylashgan Qon quyish markazi binosi ro‘parasida haydovchi O.R. yo‘l notekisligi sabab Matiz avtomobilida sekinlashgan vaqtida ortida kelayotgan yana bir Matiz rusumli avtomobil haydovchisi Z.S. to‘qnashib ketmaslik maqsadida rulni chap tomonga burgan.
Keskin burilish natijasida haydovchi Z.S. boshqaruvidagi Matiz avtomobili oldindagi Matiz’ning orqa chap tomoniga to‘qnashib, ag‘darilgan.
Hodisa natijasida tan jarohati olgan fuqarolar yo‘q. Transport vositalariga zarar yetgan.
Mazkur to‘qnashuv yuzasidan Toshkent shahar IIBB YHXB mas’ul xodimlari tomonidan surishtiruv harakatlari olib borilmoqda.
Bundan avval Samarqandda “ZIL” yuk mashinasi bilan to‘qnashgan Damas haydovchisi voqea joyida halok bo‘lgani, Surxondaryoda haydovchining uxlab qolishi oqibatida Nexia beton devorga borib urilgani hamda Qamchiq dovonida MAN yuk mashinasi va Cobalt xandaqqa tushib ketgani haqida xabar berilgandi.
Izoh (0)