Тошкент шаҳар ИИББ Жиноят қидирув бошқармаси Уюшган жиноятчиликка ва қурол билан қонунга хилоф равишда муомала қилишга қарши курашиш бўлими ходимлари томонидан пойтахтда олиб борилган тезкор қидирув тадбирлари давомида қуролларнинг ноқонуний сотилишининг олди олинди.
Маълум қилинишича, пойтахтнинг Яшнобод туманида 1998 йилда туғилган Рустам исмли йигит ўқотар қуролни 2 минг долларга сотмоқчи бўлганида қўлга олинган.
Сўроқ қилинганда Рустам қуролни 1998 йилда туғилган яқин таниши билан бирга топганини айтган. Шундан сўнг қурол кейинчалик сотиш учун Улуғбекнинг уйида яшириб қўйилган. Улуғбек уйи тинтув қилинганда АПС тўппончаси ашёвий далил сифатида олиб қўйилган.
ИИББ суд-тиббий экспертиза маркази хулосасига кўра, қурол отиш учун яроқли деб топилган.
Ҳолат юзасидан Жиноят кодексининг 248-моддаси (қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) билан жиноят иши қўзғатилган. Тергов ҳаракатлари олиб борилмоқда.
Эслатиб ўтамиз, Жиноят кодексининг 248-моддасига мувофиқ қуролни, патронларни, ўқ-дориларни, портловчи моддаларни ва портлатиш қурилмаларини ўз ихтиёри билан топширган жисмоний ва юридик шахс қонун ҳужжатларида белгиланган жавобгарликдан озод қилинади.
Шунингдек, Вазирлар Маҳкамасининг «Рўйхатга олинмаган қуролни, патронларни, ўқ-дориларни, портловчи моддаларни ва портлатиш қурилмаларини ички ишлар органларига ўз ихтиёри билан топшириш тартиби тўғрисидаги низомни тасдиқлаш ҳақида»ги қарорига кўра, жисмоний ёки юридик шахс ички ишлар органларига қурол ва (ёки) уларнинг ўқ-дориларини ўз ихтиёри билан топширганлиги учун пул мукофоти билан тақдирланиши, 1974 йилгача ишлаб чиқарилган фуқаровий ўқотар қурол топширган жисмоний шахс эса уни имтиёзли олиш ҳуқуқига эга бўлиши мумкин.
Изоҳ (0)