Farg‘ona viloyati Quvasoy shahri hududida yuk mashinasi bilan to‘qnashgan Matiz haydovchisi voqea joyida vafot etdi. Bu haqda viloyat Yo‘l harakati xavfsizligi boshqarmasi axborot xizmati xabar berdi.
Ma’lum qilinishicha, yo‘l-transport hodisasi Quvasoy shahri hududidan o‘tgan Farg‘ona–Quvasoy avtomobil yo‘lida sodir bo‘lgan. “Quvasoy ishonch taksi” korxonasiga qarashli Matiz avtomobilining 30 yoshli haydovchisi boshqaruvni yo‘qotib, qarama-qarshi tomondan harakatlangan. Natijada ro‘parasidan kelayotgan 40 yoshli haydovchi boshqaruvidagi Daimler Benz yuk mashinasiga borib urilgan.
Oqibatda 30 yoshli haydovchi og‘ir tan jarohatlari sabab voqea joyida halok bo‘lgan. Hozirda mazkur avtohalokatning sabablari o‘rganilmoqda.
Avvalroq Toshkentda Cobalt va Lacetti ishtirokida sodir bo‘lgan YTHda 30 yoshli haydovchi vafot etgani, Qashqadaryoda to‘y kuni kuyovning otasi va ikki qarindoshi hamda kelinning xolasi YTHga uchrab, halok bo‘lgani, Toshkentda 60 yoshli ayol yuk mashinasi urib ketishi oqibatida halok bo‘lgani hamda Andijonda ikki Nexia yo‘lni kesib o‘tayotgan velosipedchini urib ketgani haqida xabar berilgandi.
Izoh (0)