Navoiyda uch nafar fuqaro ishtirokidagi janjalda ulardan biri pichoqlandi, deya xabar bermoqda Tergov departamenti.
Ma’lum qilinishicha, 2021-yilning 25-mart kuni soat 02:30 larda aka-uka 30 yoshli J.N. va 27 yoshli J.N. Nexia avtomashinasida Navoiy shahar Islom Karimov ko‘chasida joylashgan Amfiteatr majmuasi qarshisidagi chorrahada harakatlanib ketayotganida ular bilan yonma-yon harakatlanib ketayotgan Malibu haydovchisi 28 yoshli U.X. bilan bir-biriga “nega o‘qrayib qaraysan?” deb avtomashinalarini chekkaga to‘xtatib, hech bir sababsiz o‘zaro janjallashgan.
Oqibatda aka-ukalar U.X.ning o‘ng oyoq son sohasiga pichoqcha bilan bir necha marotaba urib, jarohat yetkazgan.
Mazkur holat yuzasidan Navoiy shahri bo‘yicha IIO FMB huzuridagi tergov bo‘limi tomonidan J.N. va J.N.ga nisbatan Jinoyat kodeksining 277-moddasi 2-qismi “a, b, v” bandi (bezorilik, ya’ni bir guruh shaxslar tomonidan sovuq qurol bilan badanga o‘rtacha og‘ir shikast yetkazish) bilan jinoyat ishi qo‘zg‘atilib, gumon qilinuvchi tariqasida jalb qilingan.
Hozirda tergov harakatlari olib borilmoqda.
Bundan avval Chiroqchida fuqaro qo‘shnisi bilan bilyardxonada tortishib qolib, uni pichoqlab o‘ldirgani, Navoiyda chiqindi yig‘ish bilan shug‘ullanuvchi fuqaro sherigi tomonidan do‘pposlab o‘ldirilgani hamda Urgutda xotinini mast holda bo‘g‘ib o‘ldirgan erkak 11 yilga qamalgani haqida xabar berilgandi.
Izoh (0)