Toshkentda Cobalt va Lacetti avtomobillari to‘qnashuvi natijasida haydovchilardan biri vafot etdi, deya xabar berdi Toshkent shahar IIBB.
Ma’lum qilinishicha, 27-mart kuni soat 15:30 larda Mirzo Ulug‘bek tumandagi shu nomli ko‘chada 43 yoshli D.K. Cobalt rusumli avtomashinasi boshqaruvini yo‘qotib, beton to‘siqqa urilgan. Oqibatda mashina qarama-qarshi yo‘nalishga o‘tib ketgan va 30 yoshli S.R. boshqarib ketayotgan Lacetti bilan to‘qnashgan.
Hodisa oqibatida Lacetti avtomashinasining yo‘lovchilari — 24 yoshli Sh.Sh., 32 yoshli N.K. shuningdek, tanasida turli darajada tan jarohatlari olgan Cobalt avtomashinasi haydovchisi kasalxonaga yotqizilgan.
Lacetti avtomashinasi haydovchisi olgan jarohatlari tufayli voqea joyida vafot etgan.
Ushbu fakt bo‘yicha Jinoyat kodeksining 266-moddasi 2-qismida (transport boshqarish qoidalarini buzish) nazarda tutilgan huquqbuzarlik bo‘yicha jinoyat ishi qo‘zg‘atildi. Hozirda tergov harakatlari olib borilmoqda.
Bundan avval Qashqadaryoda to‘y kuni kuyovning otasi va ikki qarindoshi hamda kelinning xolasi YTHga uchrab, halok bo‘lgani, Toshkentda 60 yoshli ayol yuk mashinasi urib ketishi oqibatida halok bo‘lgani hamda Andijonda ikki Nexia yo‘lni kesib o‘tayotgan velosipedchini urib ketgani haqida xabar berilgandi.
Izoh (0)