Surxondaryo viloyatida haydovchining uxlab qolishi sabab yuzaga kelgan YTH oqibatida bir yo‘lovchi halok bo‘ldi. Bu haqda IIV YHXBB axborot xizmati xabar berdi.
Ma’lum qilinishicha, 26-mart kuni soat 06:30 larda Sho‘rchi tumani “Oqtumshuq” mahallasida yashovchi 24 yoshli haydovchi Nexia avtomobilini Termiz—Denov yo‘nalishida boshqarib kelayotib, uxlab qolgan.
Oqibatda mashina yo‘lning chap tomoniga chiqib ketib, beton devorga urilgan. Avariya vaqtida mashina ichida bo‘lgan 26 yoshli yo‘lovchi shifoxonaning jonlantirish bo‘limida vafot etgan. Shuningdek, haydovchi turli darajadagi tan jarohatlari bilan shifoxonaga yotqizilgan.
Holatni keltirib chiqargan sabablar o‘rganilganida haydovchi bir kun oldin Samarqanddan Surxondaryoga qarab yo‘lga chiqqani, kuchli charchoq oqibatida uxlab qolgani aniqlangan.
Avvalroq Toshkent—O‘sh yo‘lida avtokran va uchta yengil avtomobil ishtirokida yirik YTH sodir bo‘lgani, Namanganda “Jiguli” 3 yoshli bolani urib ketgani, Samarqandda Mercedes-Benz yuk mashinasi haydovchi boshqaruvni yo‘qotishi oqibatida ag‘darilgani to‘g‘risida xabar berilgandi.
Izoh (0)