Tojikistonda 22-martdan aholini koronavirusga qarshi emlash boshlandi. Davlat rahbarining vaksinatsiya bo‘yicha imzolagan farmoniga ko‘ra, mamlakat aholisini emlash aholining zaif guruhlari o‘rtasida bosqichma-bosqich amalga oshiriladi. Bu haqda Asia-Plus xabar berdi.
Vaksinatsiya munosabati bilan Sog‘liqni saqlash va aholini ijtimoiy muhofaza qilish vazirligiga quyidagi topshiriqlar berildi:
- muayyan bosqichdagi emlash bo‘yicha tadbirlar rejasini ishlab chiqish va tasdiqlash, uni zudlik bilan davlat hokimiyatining mahalliy ijro etuvchi organlari va respublika shahar va viloyatlaridagi mas’ul tibbiyot muassasalariga yetkazish;
- COVID-19 yuqumli kasalligiga qarshi vaksinani muzlatkichli yuk mashinalarida saqlagan holda, respublika shahar va viloyatlaridagi tegishli tibbiyot muassasalariga o‘z vaqtida yetkazib berish va aholining zaif qatlamlarini immunizatsiya qilish.
Xabarga ko‘ra, birinchi bo‘lib sog‘liqni saqlash vaziri Jamoliddin Abdullozoda, uning o‘rinbosari Samariddin Alizoda va YuNISEFning Tojikistondagi vakili Osama Makkavi Kogali emlandi.
Eslatib o‘tamiz, COVAX dasturi doirasida 8-mart kuni Hindistondan Dushanbega COVID-19’ga qarshi 192 ming doza Covishield vaksinasi yetkazib berildi. Ushbu vaksina Oksford—AstraZeneca vaksinasi, ammo Hindistonda ishlab chiqarilgan bo‘lib, Covishield kodi ostida JSST tomonidan ro‘yxatdan o‘tgan.
Avvalroq sog‘liqni saqlash vazirining o‘rinbosari Samariddin Alizoda COVAX dasturi doirasida aholining 20 foizini emlanishini aytgandi. Umuman olganda, Tojikiston ushbu dastur doirasida 624 ming dozada vaksina oladi.
Covishield haqida gapirar ekan, vazir o‘rinbosari Hindistondagi Serum instituti o‘zini sifatli vaksinalar ishlab chiqaradigan professional institut sifatida namoyon qilgan, deya ta’kidladi.
Ayni paytda Tojikiston Rossiyaning “Sputnik V” va Xitoyning CoronaVac vaksinalarini ro‘yxatdan o‘tkazmoqchi. Alizodaning aytishicha, Tojikiston fuqarolari qaysi vaksina bilan emlanishini o‘zlari tanlashi mumkin. Vaksinalar ixtiyoriy ravishda va bepul beriladi.
Avvalroq Turkmanistonning Toshhovuz viloyatida shifokor va politsiyachilarni Xitoy vaksinasi bilan emlash boshlangani haqida xabar berilgandi. Xabarga ko‘ra, vaksinaning partiyasi 6-mart kuni mamlakatga olib kelingan. Aynan qaysi vaksinadan foydalanilganini aniqlashning iloji bo‘lmagan, chunki preparatning nomi xitoycha harflarda yozilgan.
Eslatib o‘tamiz, 17-mart kuni Toshkentga AstraZeneca vaksinasining 660 ming dozasi olib kelindi. Ular YuNISEF tomonidan COVAX dasturi doirasida olib kelindi. Vaksinalar O‘zbekistonga bepul yetkazib berilmoqda.
Izoh (0)