Tojikiston prezidenti Emomali Rahmon o‘zining parlamentga an’anaviy yillik murojaatida mamlakatda koronavirus yo‘qligini ma’lum qildi, deb yozadi Asia-Plus.

Foto: Tojikiston prezidenti matbuot xizmati

“Bugun biz shukr qilamizki, yanvar boshidan buyon mamlakatda koronavirusga chalinish holatlari yo‘q, ya’ni men ishonch bilan aytamanki, Tojikistonda COVID-19 yo‘q”, — dedi u.

Ammo prezident bu beparvo bo‘lishimiz, epidemik choralarni e’tiborsiz qoldirishimiz kerak degani emas, dedi.

“Epidemiya choralariga rioya qilish, gigiyena vositalari, antiseptiklar, tibbiy niqoblardan foydalanish zarurligini ta’kidlab o‘taman, — dedi prezident. — Respublika shtabi masjidlarning ochilishiga ruxsat berdi, lekin masjidga keluvchilar, ayniqsa, juma namozlari chog‘ida belgilab qo‘yilgan choralarga rioya qilishi shart. Agar u yoki bu masjidda epidemik choralarga amal qilinmasa, ularni yopishga to‘g‘ri keladi”.

Bundan tashqari, davlat rahbari tibbiyot sohasi xodimlariga, tadbirkorlarga va butun Tojikiston xalqiga minnatdorlik bildirdi.

“Bunday og‘ir davrda sabr-toqat qilib, sarosimaga tushmagan, balki o‘zaro jipslashgan va bir-biriga hurmat ko‘rsatgan, shifokorlar va ularning oilalarini qo‘llab-quvvatlagan, davlat bilan yonma-yon ishlagan barcha fuqarolarga eng chuqur ehtiromimni bildiraman. Tibbiyot muassasalariga va aholining kambag‘al qatlamlariga tibbiy uskunalar, dorilar va oziq-ovqat mahsulotlari bilan yordam qilgan saxovatli kishilarga ham”, — dedi mamlakat prezidenti.

Nashr eslatishicha, 11-yanvardan buyon mamlakatda birorta ham koronavirusga chalinish holati qayd etilmagan.

Pandemiya boshidan buyon Tojikistonda 13 308 kishi koronavirus bilan kasallangan, ularning 90 nafari vafot etgan, 13 218 kishi esa sog‘aygan.