Suvaysh kanalida ketma-ket besh kundan buyon Ever Given kemasini sayozlikdan chiqarib olishga urinishmoqda. Misr prezidenti kemani yuklardan bo‘shatishga tayyorlanishni buyurdi, deb yozadi Meduza.
Suvaysh kanalida besh kundan buyon Ever Given yuk kemasini sayozlikdan chiqarib olisholmayapti. Suvaysh kanali boshqarmasi boshlig‘i Usama Rabi ma’lum qilishicha, galma-galdan ikkita operatsiya o‘tkazilmoqda: dastlab 12 soat davomida ekskavatorlar ishlab tuproqni olib tashlamoqda, so‘ng yana 12 soat mobaynida shatakchi kemalar kemani joyidan siljitishga urinmoqda. Vaqtning bunday taqsimlanishi suvning ko‘tarilishi va pasayishi tufayli shatakchi kemalar doim ham ishlay olmasligi sababli zarurdir. Operatsiyada jami 13 ta shatakchi kema qatnashmoqda. Hafta davomida ishlab kelgan 11 ta kemaga 28-mart, yakshanba kuni yana ikkitasi kelib qo‘shildi, shuningdek, yana bir nechta suzuvchi ekskavatorlar va soatiga 2000 metr kub tuproqni kavlashga qodir tuproq qazuvchi qurilma ham operatsiyaga qo‘shildi.
27-mart kuni kechqurun konteyner kemasini birinchi marta bir necha metrga siljitishga muvaffaq bo‘lishdi. Bu yuz bergan vaqtda shatakchi kemalar kapitanlari quvonchdan bir vaqtda birgalikda o‘z sirenalari bilan signal berdi.
Misr prezidenti Abdul as-Sisiy konteyner kemasini yuklardan bo‘shatishga tayyorgarlik ko‘rishni boshlashni buyurdi. Usama Rabi aytishicha, prezident birinchi va ikkinchi ssenariylarning muvaffaqiyatsizlikka uchrashini kutmasdan, uchinchi ssenariyga tayyorlanishga qaror qilgan. Birinchi va ikkinchi ssenariylar deganda Ever Given kemasini shatakchi kemalar hamda ekskavatorlar yordamida tuproqni qazish orqali chiqarib olishga urinishlar nazarda tutilmoqda. Shuningdek, as-Sisiy bortda turgan 18 mingta konteynerlarning ba’zilarini tushirishda zarur bo‘ladigan maxsus uskunadan foydalanishga ham ruxsat berdi. Misr prezidentining dengiz portlari masalalari bo‘yicha maslahatchisi Muhab Mamish ma’lum qilishicha, kemadan yuklarni tushirish 30-mart kuni boshlanishi mumkin. “Kemadan yuklarni tushirish ertadan keyin, ya’ni seshanba kuni, kemani shatakchilar yordamida tortib chiqarish imkoniyatlari tugab bitganidan keyin boshlanadi”, — dedi u.
Suvaysh kanalida 369 ta kema navbatda turib qoldi. Ularning katta qismi — konteyner kemalari, shuningdek, neft va suyultirilgan tabiiy gaz ortilgan tankerlar. Ularga yuklangan mahsulotlarning umumiy qiymati qariyb 10 milliard dollarni tashkil etadi. Suvaysh kanali boshqarmasida Misrning Ever Given bilan bog‘liq vaziyatdan ko‘rayotgan talafoti kuniga 14 million dollarga baholanmoqda. Boshqarma boshlig‘i Usama Rabi ta’kidlashicha, Misr tirbandlikda turgan kemalarga kanaldan o‘tish to‘lovi uchun chegirmalar taklif qiladi.
Ishlar qancha davom etishi hamon aniq emas. Dastlab kemani chiqarib olish bir necha kun vaqt olishi rejalashtirilgan edi, ammo endi ba’zi mutaxassislar vaziyat bir necha haftaga cho‘zilishini taxmin qilmoqda. Reuters qayd etishicha, agar operatsiya cho‘zilib ketishi aniq bo‘lib qolsa, kanalda tirbandlikda qolib ketgan kemalar egalari ularni Yaxshi Umid burni orqali Afrikani aylanib o‘tadigan yo‘l bilan olib ketishi mumkin.
Dengiz kemalarini kuzatish servislariga qaraganda, ko‘pchilik allaqachon shunday yo‘l tutmoqda. Ammo agar Suvaysh kanalidan O‘rta Yer dengizi orqali Yevropaning eng yirik Rotterdam portigacha bo‘lgan yo‘l o‘rtacha 11 kun vaqt olsa, aylanma yo‘lga kamida yana 26 kun ketadi. Yo‘lga ketgan qo‘shimcha har bir kun uchun kema egasi yoqilg‘iga bir necha o‘n ming dollardan sarflashi kerak bo‘ladi. Qizil dengizda turib qolish ham qo‘shimcha xarajatlarga olib keladi, chunki har qanday vaziyatda ham ekipajga maosh to‘lash kerak bo‘ladi.
Izoh (0)