O‘zbekistonga 2021-yilning yanvar–fevral oylarida xorijdan 1,5 million dollarga 85 ta elektromobil import qilingan. Bu 2020-yilning mos davriga nisbatan 78 taga ko‘p, deb yozmoqda “Gazeta.uz” Davlat statistika qo‘mitasi ma’lumotlariga tayanib.
2020-yil davomida O‘zbekistonda 2,9 million dollarga 131 ta elektromobil import qilingan. Shunday qilib, 2021-yilning dastlabki ikki oyida mamlakatga 2020-yildagi elektromobillar importining qariyb 65 foizi keltirilgan. 2019-yilda bu ko‘rsatkich 39, 2018-yilda esa 13 tani tashkil qilgan. O‘zbekistonda elektromobillar importi ikki yilda 10 barobarga oshdi.
2021-yilning yanvar–fevral oylarida O‘zbekiston asosan Xitoydan keltirilgan (55 ta). Undan keyingi o‘rinda Turkiya (24 ta), Koreya (3 ta), AQSh (2 ta) va Litvadan (1 ta) import qilingan.
O‘zbekistonda elektromobillar uchun yig‘im to‘lashni bekor qilish taklif etilgani haqida xabar berilgan edi. Ushbu yig‘imni bekor qilish Vazirlar Mahkamasining 2020-yil 29-dekabrdagi qarorida ko‘zda tutilgandi. Ayni paytda O‘zbekistonda elektromobillar importi boj va aksiz solig‘idan ozod qilingan.
Izoh (0)