Toshkentning Yashnobod tumanida 60 yoshli ayol yuk mashinasi urib ketishi oqibatida halok bo‘ldi. Bu haqda poytaxt YHXBB matbuot xizmati xabar berdi.
Voqea 24-mart kuni soat 17:55 da tumanning Muxtor Ashrafi va Izzat ko‘chalari kesishmasida ro‘y bergan. 24 yoshli haydovchi R.A. DAF yuk mashinasini boshqarish davomida belgilanmagan joydan yo‘lni kesib o‘tayotgan piyoda 60 yoshli ayol O.L.ni urib yuborgan.
Dastlabki ma’lumotlarga ko‘ra, piyoda transport vositasining haydovchiga ko‘rinmaydigan “ko‘r” hududida bo‘lgan. Ayol olgan jarohatlari tufayli voqea joyida halok bo‘lgan.
Holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bo‘yicha jinoiy ish qo‘zg‘atildi. Bir qator ekspertizalar tayinlanib, tergov olib borilmoqda.
2020-yilning oktabrida Surxondaryoda ham shunday YTH yuz bergandi. Yuk mashinasi haydovchisi yo‘lning belgilanmagan qismidan o‘tayotgan ikki piyodani ko‘rmay, ularni urib ketgan. Oqibatda piyodalardan biri olgan tan jarohatidan shifoxonada vafot etgan.
Mavzuga doir:
- Namanganda Isuzu yuk mashinasi piyodani urib yubordi. Jabrlanuvchi shifoxonada vafot etdi
- Sergelida MAN yuk mashinasi piyodani bosib ketdi. Jabrlanuvchi voqea joyida halok bo‘ldi
- Buxoroda avtomobilini ko‘zdan kechirayotgan haydovchini yuk mashinasi urib ketdi. Jabrlanuvchi voqea joyida vafot etdi
- Farg‘onada yuk mashinasi yo‘l chetida ketayotgan piyodani urib yubordi. Jabrlanuvchi shifoxonada vafot etdi
Izoh (0)