AQShda hozirgi kunga qadar mashhur hisoblanuvchi Gambino mafiya oilasiga tegishli bo‘lgan 1960-yilgi Chevrolet Impala sotuvga qo‘yildi. Sotuvchi jangovar o‘qlardan ilma-teshik bo‘lgan avtomobil uchun 20 ming dollar so‘ramoqda, deb xabar beradi Motor.
Sotuvga qo‘yilgan Impala modelning ikkinchi avlodiga taalluqli. Avtomobil xardtop-kupe va kabriolet kuzvolarida chiqarilgan. Mashinaning tashqi ko‘rinishi ko‘plab amerikaliklarga ma’qul kelgan uchtalik orqa faralari bilan ajralib turadi. Bu kabi modelni xarid qilganlar orasida xalq orasida “Katta Polli” nomi bilan tanilgan Pol Kastellano ham bor.
Kelib chiqishi asli italyan bo‘lgan amerikalik Kastellano jinoiy oilasining a’zosi bo‘lgan, keyinroq esa Nyu-Yorkdagi jinoyat olamini nazorat qiluvchi “beshta oila”dan iborat Gambino mafiya to‘dasiga rahbarlik qilgan. Impala uzoq yillar mafiyaga xizmat qilgan va noma’lum sabablarga ko‘ra avtomobil garajlarning birida uzoq vaqt qolib ketgan.
E’lon qilingan suratlarga ko‘ra, Impala bir necha bor otishmalarda ishtirok etgan. Avtomobil kuzovida o‘q izlari va shikastlar saqlanib qolgan, haydovchi o‘rindig‘iga esa qurol uchun g‘ilof tikilgan. Avtomobilning jinoyat olami vakillariga tegishli ekanligini isbotlovchi yana bir dalil — mashina g‘aladonida Kastellano oilasi tomonidan samolyotga xarid qilingan eski chiptalar borligi.
Chevrolet Impala 230 ot kuchiga ega 4,6 litrli V8 dvigateli yordamida harakatga keladi. Motor ikki pog‘onali avtomat transmissiya yordamida boshqariladi. Sotuvchining so‘zlariga ko‘ra, potensial xaridordan avtomobilni qayta tiklashi uchun ancha vaqt va mablag‘ talab etiladi.
Avvalroq AQShda “Cho‘qintirgan ota” filmidagi Cadillac limuzini auksionga qo‘yilgani to‘g‘risida xabar berilgandi.
Izoh (0)