Qashqadaryoda IIB xodimlari uchun qurilgan ko‘p qavatli uyning oltinchisi foydalanishga topshirildi

Qashqadaryo viloyatining Qarshi shahrida IIB hamda Milliy gvardiya xodimlari uchun mo‘ljallangan yangi ko‘p qavatli uy foydalanishga topshirildi. Bu haqda xabar bergan “Daryo” muxbirining yozishicha, viloyatda bunday xonadonlar soni oltitaga yetgan.

“Umumiy qiymati 4 milliard 805 million so‘m bo‘lgan besh qavatli, 30 xonadonli yangi uy viloyatdagi IIB hamda Milliy gvardiya xodimlari uchun qurib bitkazilgan bo‘lib, yangi xonadonlar Navro‘z bayrami munosabati bilan tantanali ravishda foydalanishga topshirildi”, — deydi “Qishloqqurilishinvest” MChJ injiniring kompaniyasining Qashqadaryo viloyat filiali direktori Qo‘yli Narzullayev.

Mazkur uy ochilishida ishtirok etgan viloyat IIB boshlig‘i Shuhrat Sotvoldiyev ko‘p qavatli turar joy viloyatda IIB xodimlari uchun qurib bitkazilgan oltinchi uy ekanini ta’kidlab, Prezident Shavkat Mirziyoyev tomonidan soha xodimlariga qaratilayotgan e’tibordan mamnunligini bildirdi.

Eslatib o‘tamiz, avvalroq 2017—2020-yillarda viloyatda “Qishloqqurilishinvest” MChJ injiniring kompaniyasi buyurtmasi asosida rahbar xodimlar uchun 175 ta, Mudofaa vazirligi harbiy xizmatchilariga 264 ta, FVV harbiylariga 30 ta, Milliy gvardiya xodimlariga 75 ta, IIB xodimlariga 135 ta, DXX harbiylari uchun 210 ta, yosh oilalar uchun 150 ta, og‘ir ijtimoiy ahvolga tushib qolgan ayollar uchun 264 ta, profilaktika inspektorlari uchun 568 ta turar joy qurilib, foydalanishga topshirilgani xabar berilgandi.