Istanbulda o‘zbekistonlik deya gumon qilingan shaxs vafot etdi. Konsullik uni taniganlar aloqaga chiqishini so‘ramoqda

Turkiyada o‘zbekistonlik deya gumon qilingan shaxs vafot etdi. Bu haqda O‘zbekistonning Istanbuldagi Bosh konsulligi xabar berdi.

Ta’kidlanishicha, O‘zbekistonning Istanbuldagi Bosh konsulligiga 2021-yil mart oyida yuborilgan faksogrammada 2020-yil oktabr oyi boshlarida kuchli zaharlanish oqibatida hushini yo‘qotgan, shaxsini tasdiqlovchi hujjat va mobil telefoniga ega bo‘lmagan shaxs Istanbul shahridagi “Göztepe prof. dr. Süleyman Yalçın şehir hastanesi”ga yotqizilgani, keyinchalik “Cinar 2 Bakım Merkezi”ga ko‘chirilgani ma’lum qilingan.

Ushbu shaxs intensiv terapiya bo‘limiga o‘tkazilishidan oldin o‘zini 1987-yilda tug‘ilgan “Said Nomatov” deb aytgan (O‘zbekiston fuqarosi bo‘lish mumkin).

“Bosh konsullik xodimlari tomonidan ko‘p marotaba shifoxonaga tashrif amalga oshirilishiga qaramasdan, shaxsning ahvoli o‘ta og‘irligi tufayli uning ismi sharifi va qaysi davlat fuqarosi ekaniga oydinlik kiritish imkoni bo‘lmadi”, — deyiladi konsullik xabarida.

Fuqaro 23-mart kuni “Cinar 2 Bakım Merkezi”da vafot etgan.

Shu munosabat bilan, konsullik ushbu shaxsni taniganlardan Istanbuldagi Bosh konsulxonaga yoki Tashqi mehnat migratsiyasi agentligining Istanbuldagi vakiliga +90 (212) 3232037 raqami orqali murojaat qilishlarini so‘ramoqda.

Avvalroq Turkiyada o‘zbekistonlik ayol o‘zini 10-qavatdan tashlab, vafot etgani, 31 yoshli o‘zbekistonlik tilanchi tomonidan pichoqlab o‘ldirilgani hamda Istanbulning Chatalja tumanida yuzaga kelgan o‘zaro janjal oqibatida O‘zbekiston fuqarosi, 1986-yilda tug‘ilgan X.X. jarohat olib, vafot etgani haqida xabar berilgandi.