24-mart kuni Bandlik va mehnat munosabatlari vazirligida Odam savdosiga va majburiy mehnatga qarshi kurashish milliy komissiyasining navbatdan tashqari yig‘ilishi bo‘lib o‘tdi. Yig‘ilish Oliy Majlis Senatining Facebook’dagi sahifasida translyatsiya qilingan.
Yig‘ilishda ma’lum qilinishicha, xodimlarni o‘z majburiyatiga kirmaydigan ishlarga jalb etish holatlari kuzatilmoqda. Xususan, paxta terimi mavsumida 42 nafar mansabdor shaxs ma’muriy javobgarlikka tortilgan. Tegishli hujjatlar sudga yo‘naltirilgan.
“Statistikada qaysidir xalq ta’limi tizimi xodimi majburiy mehnatga jalb etilgani uchun chora ko‘rilgani keltirilmoqda. Albatta, aniqlangan holatlar bo‘yicha xodimlarimizga chora ko‘rganmiz. Lekin birorta xalq ta’limi bo‘limi xodimi ko‘chani obodonlashtirishga yoki ‘temir daftar’ni to‘ldirishga o‘zi topshiriq bermaydi. Ya’ni jazo muqarrarligi prinsipi faqatgina xalq ta’limi xodimi bilan cheklanib qolishi kerak emas. Unga kim topshiriq bergan bo‘lsa, unga ham ta’sir qilish kerak. Ammo hozirgacha statistikada xalq ta’limi xodimlariga topshiriq bergan odamga chora ko‘rildi, degan narsa ko‘rilmadi. Asl sababchilarni topib, ularni javobgarlikka tortish bo‘yicha chora ko‘rish kerak”, — deydi xalq ta’limi vaziri Sherzod Shermatov.
Bundan tashqari, Oliy Majlis Senati raisi Tanzila Norboyeva bolalarni majburiy mehnatga jalb etish bo‘yicha qonuniy javobgarlikni kuchaytirish kerakligini qo‘shimcha qilgan.
Izoh (0)