22—23-mart kunlari Qirg‘iziston ichki ishlar vaziri militsiya general-mayori Ulan Niyazbekov boshchiligidagi delegatsiya O‘zbekistonga amaliy tashrif bilan keldi, deb xabar beradi IIV matbuot xizmati.
Ma’lum qilinishicha, 23-mart kuni O‘zbekiston ichki ishlar vaziri general-leytenant Po‘lat Bobojonovning qirg‘izistonlik hamkasbi bilan rasmiy uchrashuvi bo‘lib o‘tgan.
Uchrashuv chog‘ida tomonlar ikki tomonlama idoralararo hamkorlik masalalarini muhokama qilgan, jumladan, jinoyatchilikka qarshi kurash, tergov va sud organlaridan yashirinib yurgan shaxslarni qidirib topish, chegaraoldi hamkorlik, kasbiy tajriba almashishni faollashtirish, shuningdek, tomonlarni qiziqtirgan boshqa masalalar muhokama qilingan.
“Qirg‘izistonlik mehmon ichki ishlar organlarida olib borilayotgan islohotlar jarayoni, tizim faoliyatiga axborot texnologiyalarni joriy etilishining ijobiy natijalari, shuningdek, jinoyatchilikni kamaytirish hamda uning oldini olish borasidagi ishlarni mahallabay amalga oshirishning yo‘nalishlari bo‘yicha batafsil tanishtirildi”, — deyiladi xabarda.
Tashrif davomida Ulan Niyazbekov boshchiligidagi delegatsiya Toshkent shahar ichki ishlar bosh boshqarmasi va IIV Yo‘l harakati xavfsizligi bosh boshqarmasi faoliyati bilan yaqindan tanishgan. Mehmonlarga jamoat tartibi va fuqarolarning xavfsizligini ta’minlash, mahallalarda jinoyatchilikni barvaqt oldini olish, profilaktika inspektorlarining bu yo‘nalishdagi faoliyatini takomillashtirish bo‘yicha ishlarni tashkil etishning mexanizmi hamda yo‘llardagi xavfsizlikni ta’minlashning kompleks tizimi haqida ma’lumotlar taqdim etilgan.
Bundan tashqari, Qirg‘iziston IIV delegatsiyasi tomonidan Namangan hamda Farg‘ona viloyatlari ichki ishlar boshqarmalarining faoliyati o‘rganib chiqilishi rejalashtirilgan.
Avvalroq O‘zbekiston—Qirg‘iziston chegarasini delimitatsiya va demarkatsiya qilish bo‘yicha qirg‘iz hukumati delegatsiyasi rahbari Toshkentga kelgani to‘g‘risida xabar berilgandi.
Eslatib o‘tamiz, 11-mart kuni Shavkat Mirziyoyev Qirg‘iziston prezidenti Sadir Japarovni qabul qilgandi. Uchrashuvda 2017-yil 5-sentabrda imzolangan O‘zbekiston–Qirg‘iziston davlat chegarasi to‘g‘risida shartnomaning tarixiy ahamiyati qayd etilib, mazkur chegaraning qolgan qismlarini ham delimitatsiya qilish maqsadida Hukumatlararo komissiyaga muzokaralarni faollashtirish bo‘yicha ko‘rsatma berilgan.
Izoh (0)