Energetika vazirligi hozirda muhokamaga qo‘yilgan “Iste’molchilarning elektr tarmoqlariga ulanishi bo‘yicha davlat xizmatlari ko‘rsatishning ma’muriy reglamentini tasdiqlash to‘g‘risida”gi hukumat qarori loyihasini Monopoliyaga qarshi kurashish qo‘mitasi bilan hali kelishib olmagan. Bu haqda qo‘mita matbuot xizmatiga tayanib, “Gazeta.uz” xabar berdi.
Eslatib o‘tamiz, mazkur hujjat Prezidentning og‘zaki ko‘rsatmasi va Adminstratsiyaning topshirig‘iga ko‘ra ishlab chiqilgan bo‘lib, unda elektr ta’minotiga ulanishi uchun yig‘im joriy etish taklif etilmoqda. Quvvati 20 kilovattgacha bo‘lgan iste’molchilar (maishiy iste’molchilardan tashqari) tayyor holda elektr tarmoqlariga ulanish bo‘yicha “Hududiy elektr tarmoqlari korxonasi” (HETK)ga bazaviy hisoblash miqdori (22-mart holatiga ko‘ra, 245 ming so‘m)ning 30 baravari (7 million 350 ming so‘m) miqdorida yig‘im o‘rnatiladi.
Shu bilan birga, ushbu iste’molchilarni elektr tarmoqlariga tayyor holda ulash yuzasidan barcha ishlar (elektr ta’minoti loyihasini ishlab chiqish, qurilish-montaj va ishga tushirish-sozlash ishlarini bajarish, elektr energiyasini o‘lchash vositasini o‘rnatish va plombalash naryadini rasmiylashtirish va elektr ta’minoti shartnomasini tuzish) HETK tomonidan amalga oshiriladi.
Qo‘mitaning ma’lum qilishicha, loyihaning birinchi tahriri Normativ-huquqiy hujjatlar loyihalarini ishlab chiqish va kelishishning yagona elektron tizimi orqali kelib tushgan. Loyihaning birinchi variantida Energetika vazirligi BHMning 10 va 20 baravari miqdorida bir martalik to‘lovni o‘rnatishni taklif qilgan. Monopoliyaga qarshi kurashish qo‘mitasi maishiy iste’molchilardan bir martalik to‘lovni undirmaslikni, shuningdek, tegishli vazirlik va idoralar mutaxassislari hamda ushbu sohada ish yuritadigan tadbirkorlardan iborat ishchi guruh tuzish orqali tadbirkorlik faoliyati bilan shug‘ullanadigan jismoniy va yuridik shaxslar uchun to‘lov miqdori o‘rnatilishini tanqidiy tahlil qilishni yozgan.
Energetika vazirligi o‘zining hukumat qarori loyihasida Prezidentning 2019-yil 20-noyabrdagi qarori ijrosiga tayanmoqda, biroq unda qo‘shimcha yig‘imlar joriy etish va undirish nazarda tutilmagan.
Hujjatda bir martalik to‘lovning joriy etilishi moliya-iqtisod va huquqiy jihatdan asoslanmagan. Ushbu to‘lovlar uskunalarning tarmoqqa ulanishida zarur bo‘ladigan xarajatlar ichiga kirish-kirmasligi ko‘rsatilmagan.
Bundan tashqari, barcha ishlar “Hududiy elektr tarmoqlari korxonasi” tomonidan amalga oshirilishi borasidagi fakt iste’molchilarning loyihalash hamda qurilish tashkilotlarining tanlash huquqini cheklab qo‘yishi va bitta kompaniyaning “monopol” xizmatlarni ko‘rsatishiga olib kelishi mumkin.
Loyiha muhokamasi 4-aprelga qadar davom etadi.
Izoh (0)