Namangan viloyati Davlatobod tumanida naushnik taqib temiryo‘lda harakatlangan yigitni poyezd urib ketdi. Bu haqda viloyat IIB axborot xizmati xabar berdi.
Ma’lum qilinishicha, ko‘ngilsiz hodisa voqea 21-mart kuni soat 11:40 atrofida Namangan shahar “Elobod” mahallasi orqali o‘tgan Rovuston—Namangan temiryo‘l oralig‘ining 88-kilometri 6-piketida sodir bo‘lgan. “Rovuston” bekatidan “Namangan” bekatiga harakatlanib ketayotgan Qo‘qon lokomativ deposi mashinisti bo‘lib ishlovchi 49 yoshli fuqaro teplovozni oltita vagon bilan boshqarib ketayotgan vaqtida naushnik taqib, temiryo‘l izi bo‘ylab ketayotgan Davlatobod tumanida yashovchi 19 yoshli yigitni urib yuborgan.
Oqibatda fuqaro bosh miya lat yeyishi, jag‘ suyagining sinishi, o‘ng qo‘li lat yeyishi tashxisi bilan Respublika shoshilinch tibbiy yordam ilmiy markazi Namangan filialiga yotqizilgan.
Hozirda ushbu holat bo‘yicha surishtiruv harakatlari olib borilmoqda.
Avvalroq Toshkent viloyatida naushnik taqib, temiryo‘l bo‘ylab harakatlangan ikki ayolni poyezd urib ketgani va ulardan biri voqea joyida vafot etgani to‘g‘risida xabar berilgandi.
Izoh (0)