Zangiota tumani Ixtisoslashtirilgan ko‘p tarmoqli yuqumli kasalliklar shifoxonasiga har kuni 50-60 kishi joylashtirilmoqda. Bu o‘rtacha ko‘rsatkich bo‘lib, 2020-yilda 200 kishini tashkil etgan, deydi mazkur tibbiyot muassasasining ikkinchi klasteri bosh shifokori Doniyor Mirazimov “O‘zbekiston 24” telekanaliga bergan intervyusida.
“Ijtimoiy tarmoqlarda vaziyatning og‘irligi, shifoxonalarda joy yetishmasligi, jonlantirish bo‘limlari to‘lib ketgani haqidagi video va audio yozuvlar tarqaldi. Kasallanish ma’lum darajada oshmoqda, lekin vaziyat keskin emas. Vahima uchun hech qanday sabab yo‘q. Iyul va sentabr oylarida eng katta avj olish kuzatilgan bo‘lib, bir kunda 200 nafar bemorni qabul qilganmiz. Hozir esa o‘rtacha 50-60 kishi kelyapti. Farqini ko‘rishingiz mumkin”, — deydi u.
Uning so‘zlariga ko‘ra, Zangiota shifoxonasining jonlantirish bo‘limida 177 ta koyka-o‘rin tashkil qilingan bo‘lib, bugungi kunda 40 ga yaqini bo‘sh turibdi.
“Vaziyat xavotirli, biroq vahima qilishga asos yo‘q. Fuqarolarimizdan bir narsani iltimos qilmoqchiman. Koronavirus yo‘qolgani yo‘q, u yonimizda. O‘zbekistonda kasallik yo‘qolgani xususida mish-mish yuribdi. Lekin u bor. 9-martdan keyin o‘sish kuzatilmoqda. Bu katta o‘sish bo‘lmasa-da, ayni paytda sanitariya-epidemiologiya qoidalariga rioya qilish kerak. Odamlar tinchlanib, koronavirusdan qo‘rqmay qo‘ydi. Noyabr—mart oylarida bemorlar soni keskin kamaygan edi. Kuniga 15-20 nafar bemorni qabul qilganmiz”, — deya qayd etadi Doniyor Mirazimov.
Ma’lum qilinishicha, hozirda shifoxonada koronavirus bilan kasallangan 700 ga yaqin bemor davolanmoqda. Shifoxonada jami 2 mingta joy mavjud bo‘lib, shundan 1300 tasi bo‘sh va bemorlarni qabul qilishga shay holatda.
Eslatib o‘tamiz, 14-mart kuni O‘zbekistonda dekabrdan beri birinchi marta bir kunda 100 dan ortiq odamda koronavirus aniqlanib, shundan 93 tasi Toshkent shahrida qayd etilgandi. Poytaxtda koronavirusga chalinish holatlari, asosan, o‘quvchilar, talabalar va tashkilot xodimlari orasida ko‘paygan. Xususan, Toshkentdagi 77 ta maktabda o‘quvchilar orasida koronavirus infeksiyasi aniqlangan, 117-sonli bog‘chada ikki nafar tarbiyachi va bolalarda koronavirus aniqlangani sabab mazkur bog‘cha vaqtincha yopildi.
Shuningdek, O‘zbekistonda 1-apreldan ommaviy tadbirlar o‘tkazishga ayrim cheklovlar o‘rnatiladi. To‘ylarda mehmonlar soni cheklanadi.
Izoh (0)