2020-yilning avgustida Farg‘ona viloyati Beshariq tumanida yashovchi yigit unashtiruvi bekor qilingani sababli sevgan qizining uyini yoqib yuborgani to‘g‘risida xabar berilgandi. O‘zA’ning yozishicha, Jinoyat ishlari bo‘yicha Qo‘qon shahar sudida yigitga nisbatan hukm o‘qilgan.
Ma’lum bo‘lishicha, yigit 2018-yilda sevgan qizi bilan unashtirilgan. Ayrim sabablarga ko‘ra to‘y muddati cho‘zib kelingan.
Yigitning aytishicha, qizning otasi bo‘lmagan, biroq u buning sababiga qiziqmagan. Qiz turli uy yumushlarida yordam so‘rab, uni o‘z uyiga chaqirib turgan. Yigit ham uning uyiga borib, ishlariga yordam berib turgan.
Yigitning so‘zlariga ko‘ra, qiz bilan kelishmovchilik yuz bergan va yigit uni so‘kkan. Uning so‘kkanini qizning onasi eshitib qolgan va unashtiruvni bekor qilishga tushgan. Yigitning oilasi va mahallasidagi oqsoqollar borib, bu ish uchun kechirim so‘ragan. Biroq qiz tomon unashtiruvni bekor qilishga qaror qilgan.
Yigit 2020-yil 18-iyun kuni mast holda qizning uyiga borgan, biroq bu paytda uyda hech kim bo‘lmagan. U uyga kirib, mehmonxonadagi pardaga o‘t qo‘yib yuborgan. Olov kattalashib, ushbu xonadon va egalariga tegishli bo‘lgan uy-ro‘zg‘or buyumlari, kiyim kechaklari, shuningdek, bir qator hujjatlar ham yonib ketgan.
Sodir etilgan yong‘in natijasida yetkazilgan zarar miqdori 263 million 975 ming 196 so‘mga baholangan.
Jinoyat ishlari bo‘yicha Qo‘qon shahar sudi tomonidan mazkur jinoyat ishi ko‘rib chiqildi. H.J.ga uzil kesil uch yil muddatga ozodlikdan mahrum qilish jazosi tayinlanib, unga qo‘llanilgan ehtiyot chorasi bekor qilingan. Jabrlanuvchi foydasiga esa yetkazilgan moddiy zarar undirilishi belgilangan.
Izoh (0)