22—23 март кунлари Қирғизистон ички ишлар вазири милиция генерал майори Улан Ниязбеков бошчилигидаги делегация Ўзбекистонга амалий ташриф билан келди, деб хабар беради ИИВ матбуот хизмати.
Маълум қилинишича, 23 март куни Ўзбекистон ички ишлар вазири генерал-лейтенант Пўлат Бобожоновнинг қирғизистонлик ҳамкасби билан расмий учрашуви бўлиб ўтган.
Учрашув чоғида томонлар икки томонлама идоралараро ҳамкорлик масалаларини муҳокама қилган, жумладан, жиноятчиликка қарши кураш, тергов ва суд органларидан яшириниб юрган шахсларни қидириб топиш, чегараолди ҳамкорлик, касбий тажриба алмашишни фаоллаштириш, шунингдек, томонларни қизиқтирган бошқа масалалар муҳокама қилинган.
«Қирғизистонлик меҳмон ички ишлар органларида олиб борилаётган ислоҳотлар жараёни, тизим фаолиятига ахборот технологияларни жорий этилишининг ижобий натижалари, шунингдек, жиноятчиликни камайтириш ҳамда унинг олдини олиш борасидаги ишларни маҳаллабай амалга оширишнинг йўналишлари бўйича батафсил таништирилди», — дейилади хабарда.
Ташриф давомида Улан Ниязбеков бошчилигидаги делегация Тошкент шаҳар ички ишлар бош бошқармаси ва ИИВ Йўл ҳаракати хавфсизлиги бош бошқармаси фаолияти билан яқиндан танишган. Меҳмонларга жамоат тартиби ва фуқароларнинг хавфсизлигини таъминлаш, маҳаллаларда жиноятчиликни барвақт олдини олиш, профилактика инспекторларининг бу йўналишдаги фаолиятини такомиллаштириш бўйича ишларни ташкил этишнинг механизми ҳамда йўллардаги хавфсизликни таъминлашнинг комплекс тизими ҳақида маълумотлар тақдим этилган.
Бундан ташқари, Қирғизистон ИИВ делегацияси томонидан Наманган ҳамда Фарғона вилоятлари ички ишлар бошқармаларининг фаолияти ўрганиб чиқилиши режалаштирилган.
Аввалроқ Ўзбекистон—Қирғизистон чегарасини делимитация ва демаркация қилиш бўйича қирғиз ҳукумати делегацияси раҳбари Тошкентга келгани тўғрисида хабар берилганди.
Эслатиб ўтамиз, 11 март куни Шавкат Мирзиёев Қирғизистон президенти Садир Жапаровни қабул қилганди. Учрашувда 2017 йил 5 сентябрда имзоланган Ўзбекистон–Қирғизистон давлат чегараси тўғрисида шартноманинг тарихий аҳамияти қайд этилиб, мазкур чегаранинг қолган қисмларини ҳам делимитация қилиш мақсадида Ҳукуматлараро комиссияга музокараларни фаоллаштириш бўйича кўрсатма берилган.
Изоҳ (0)