Namanganda kuyov sobiq qaynotasini qasddan o‘ldirib, so‘ng jinoyatini yashirish maqsadida marhumning uyini yoqib yubordi. Bu haqda “Daryo” muxbiri Azizbek Abduvaliyev xabar bermoqda.
Hodisa 2021-yil 14-mart kuni To‘raqo‘rg‘on tumanining “Bordimko‘l” mahallasida sodir bo‘lgan. Muqaddam ikki bor sudlangan, 1994-yilda tug‘ilgan Qodir Ashuraliyev (ism-shariflar shartli) sobiq turmush o‘rtog‘i Nodira Ahadovaning 2,5 yashar o‘g‘li Aminbek uchun aliment talab qilganidan g‘azablanib, yarim tunda uning uyiga bostirib boradi. Yakka o‘zi emas, Mingbuloq tumanida yashovchi, muqaddam sudlangan 37 yoshli Shuhrat Alijonovni ham sherik qilib oladi.
Qodir Nodira Ahadova bilan 2017-yilda turmush qurgan, biroq oradan bir yil o‘tib ajrashgandi. Shundan so‘ng Nodira aliment undirish uchun murojaat qiladi, to‘lov summasi esa voqea ro‘y bergan kunga qadar 15 million so‘mga yaqinlashib qolgandi.
Ashuraliyev xonadonda sobiq qaynotasi, 1972-yilda tug‘ilgan Ilhom Qayumov bilan o‘zaro janjallashadi va sherigi bilan uning bosh qismiga bir necha bor pichoq bilan urib, qasddan o‘ldiradi. Bu payt uyda sobiq turmush o‘rtog‘i va qaynonasi bo‘lmagan, sumalak tadbiriga chiqib ketgan edi. Xonadonda qolgan sobiq qaynuka, maktabning 10-sinfida tahsil oladigan Oqil Ahadov janjal ovozidan uyg‘onib ketadi.
Uning guvoh bo‘lib qolishidan cho‘chigan jinoyatchilar bolaning oyoq-qo‘lini bog‘lab, dadasiga tegishli Damas avtomashinasiga o‘tqazishadi. Avtomobilga xonadondan o‘g‘irlangan ikki gilam va televizor ham yuklanadi. Shundan so‘ng jinoyat izlarini yashirish maqsadida jasad yotgan xona va qo‘shni xonalarga benzin quyib, yoqib yuborishadi. Bu jarayonda Ashuraliyevning yuzi va ikki qo‘li kuyadi.
Jinoiy sheriklar mashinaga o‘tirib, hodisa joyidan yashirinadi. Ashuraliyev kuygan jarohatlarini ko‘rsatish maqsadida tuman tibbiyot markaziga boradi. U shifokor oldiga kirib ketganida Oqiljon bog‘langan oyoq-qo‘llarini yechib, avtomashinani haydab qochadi. Uyiga qaytib kelib, yuz bergan holat haqida ichki ishlar idorasiga xabar beradi.
Bundan oldinroq Qayumovlar oilasining qo‘shnisi xonadonda alanga ko‘kka ko‘tarilayotgani haqida tuman yong‘in xavfsizligi bo‘limiga xabar bergan va tongga yaqin yong‘in to‘liq bartaraf etilgandi.
— Qodir Ashuraliyev tuman tibbiyot birlashmasi darvozasidan kiradi-yu, qo‘lga tushib qolishidan cho‘chib, ortga qaytadi va Respublika shoshilinch tibbiy yordam ilmiy markazi Namangan filialiga yo‘l oladi. Kuygan jarohatlarini “dalada o‘t yoqib o‘tirganda oldim”, deb shifokorlarga tushuntirgan, unda biz allaqachon uning iziga tushgandik. Ashuraliyevning jinoiy sherigi, “qassob” laqabi bilan tanilgan Alijonovni esa uyidan topdik. Bir soatning nari-berisida jinoyatchilar ushlandi, — deydi tuman IIB jinoyat-qidiruv bo‘limi tezkor vakili, katta leytenant Shavkatjon Qosimov.
Hozirda mazkur holat yuzasidan tuman prokuraturasi tomonidan jinoyat ishi qo‘zg‘atilib, tergov-surishtiruv ishlari olib borilmoqda.
15-mart kuni To‘raqo‘rg‘ondagi madaniyat markazida yuz bergan mazkur jinoyat muhokamasiga bag‘ishlangan yig‘ilish ham bo‘lib o‘tdi. Unda viloyat hokimi, viloyat prokurori va viloyat IIB boshlig‘i, profilaktika inspektorlari, jamoatchilik vakillari ishtirok etdi.