2020 йилнинг августида Фарғона вилояти Бешариқ туманида яшовчи йигит унаштируви бекор қилингани сабабли севган қизининг уйини ёқиб юборгани тўғрисида хабар берилганди. ЎзАънинг ёзишича, Жиноят ишлари бўйича Қўқон шаҳар судида йигитга нисбатан ҳукм ўқилган.
Маълум бўлишича, йигит 2018 йилда севган қизи билан унаштирилган. Айрим сабабларга кўра тўй муддати чўзиб келинган.
Йигитнинг айтишича, қизнинг отаси бўлмаган, бироқ у бунинг сабабига қизиқмаган. Қиз турли уй юмушларида ёрдам сўраб, уни ўз уйига чақириб турган. Йигит ҳам унинг уйига бориб, ишларига ёрдам бериб турган.
Йигитнинг сўзларига кўра, қиз билан келишмовчилик юз берган ва йигит уни сўккан. Унинг сўкканини қизнинг онаси эшитиб қолган ва унаштирувни бекор қилишга тушган. Йигитнинг оиласи ва маҳалласидаги оқсоқоллар бориб, бу иш учун кечирим сўраган. Бироқ қиз томон унаштирувни бекор қилишга қарор қилган.
Йигит 2020 йил 18 июнь куни маст ҳолда қизнинг уйига борган, бироқ бу пайтда уйда ҳеч ким бўлмаган. У уйга кириб, меҳмонхонадаги пардага ўт қўйиб юборган. Олов катталашиб, ушбу хонадон ва эгаларига тегишли бўлган уй-рўзғор буюмлари, кийим кечаклари, шунингдек, бир қатор ҳужжатлар ҳам ёниб кетган.
Содир этилган ёнғин натижасида етказилган зарар миқдори 263 миллион 975 минг 196 сўмга баҳоланган.
Жиноят ишлари бўйича Қўқон шаҳар суди томонидан мазкур жиноят иши кўриб чиқилди. Ҳ.Ж.га узил кесил уч йил муддатга озодликдан маҳрум қилиш жазоси тайинланиб, унга қўлланилган эҳтиёт чораси бекор қилинган. Жабрланувчи фойдасига эса етказилган моддий зарар ундирилиши белгиланган.
Изоҳ (0)