Энергетика вазирлиги ҳозирда муҳокамага қўйилган «Истеъмолчиларнинг электр тармоқларига уланиши бўйича давлат хизматлари кўрсатишнинг маъмурий регламентини тасдиқлаш тўғрисида»ги ҳукумат қарори лойиҳасини Монополияга қарши курашиш қўмитаси билан ҳали келишиб олмаган. Бу ҳақда қўмита матбуот хизматига таяниб, «Gazeta.uz» хабар берди.
Эслатиб ўтамиз, мазкур ҳужжат Президентнинг оғзаки кўрсатмаси ва Админстрациянинг топшириғига кўра ишлаб чиқилган бўлиб, унда электр таъминотига уланиши учун йиғим жорий этиш таклиф этилмоқда. Қуввати 20 киловаттгача бўлган истеъмолчилар (маиший истеъмолчилардан ташқари) тайёр ҳолда электр тармоқларига уланиш бўйича «Ҳудудий электр тармоқлари корхонаси» (ҲЭТК)га базавий ҳисоблаш миқдори (22 март ҳолатига кўра, 245 минг сўм)нинг 30 баравари (7 миллион 350 минг сўм) миқдорида йиғим ўрнатилади.
Шу билан бирга, ушбу истеъмолчиларни электр тармоқларига тайёр ҳолда улаш юзасидан барча ишлар (электр таъминоти лойиҳасини ишлаб чиқиш, қурилиш-монтаж ва ишга тушириш-созлаш ишларини бажариш, электр энергиясини ўлчаш воситасини ўрнатиш ва пломбалаш нарядини расмийлаштириш ва электр таъминоти шартномасини тузиш) ҲЭТК томонидан амалга оширилади.
Қўмитанинг маълум қилишича, лойиҳанинг биринчи таҳрири Норматив-ҳуқуқий ҳужжатлар лойиҳаларини ишлаб чиқиш ва келишишнинг ягона электрон тизими орқали келиб тушган. Лойиҳанинг биринчи вариантида Энергетика вазирлиги БҲМнинг 10 ва 20 баравари миқдорида бир марталик тўловни ўрнатишни таклиф қилган. Монополияга қарши курашиш қўмитаси маиший истеъмолчилардан бир марталик тўловни ундирмасликни, шунингдек, тегишли вазирлик ва идоралар мутахассислари ҳамда ушбу соҳада иш юритадиган тадбиркорлардан иборат ишчи гуруҳ тузиш орқали тадбиркорлик фаолияти билан шуғулланадиган жисмоний ва юридик шахслар учун тўлов миқдори ўрнатилишини танқидий таҳлил қилишни ёзган.
Энергетика вазирлиги ўзининг ҳукумат қарори лойиҳасида Президентнинг 2019 йил 20 ноябрдаги қарори ижросига таянмоқда, бироқ унда қўшимча йиғимлар жорий этиш ва ундириш назарда тутилмаган.
Ҳужжатда бир марталик тўловнинг жорий этилиши молия-иқтисод ва ҳуқуқий жиҳатдан асосланмаган. Ушбу тўловлар ускуналарнинг тармоққа уланишида зарур бўладиган харажатлар ичига кириш-кирмаслиги кўрсатилмаган.
Бундан ташқари, барча ишлар «Ҳудудий электр тармоқлари корхонаси» томонидан амалга оширилиши борасидаги факт истеъмолчиларнинг лойиҳалаш ҳамда қурилиш ташкилотларининг танлаш ҳуқуқини чеклаб қўйиши ва битта компаниянинг «монопол» хизматларни кўрсатишига олиб келиши мумкин.
Лойиҳа муҳокамаси 4 апрелга қадар давом этади.
Изоҳ (0)