“O‘zbekiston tovar-xomashyo birjasi”da 1 tonna Ai-80 markali benzin arzonlashdi, deya xabar bermoqda birja matbuot xizmati.
Qayd etilishicha, 2021-yil 15—21-mart kunlari tovar-xomashyo birjasiga 35 965,0 tonna Ai-80 markali avtomobil benzini qo‘yildi va ulardan 14 588,0 tonnasi, ya’ni 40,6 foizi sotildi. O‘tkazilgan savdolarda har kuni o‘rtacha 29 xaridor ishtirok etdi.
Ko‘rib chiqilayotgan davrda Ai-80 markali avtomobil benzinining o‘rtacha kunlik narxi bir tonnasi uchun 6 million 287 ming 500 so‘mdan 6 million 269 ming 700 so‘mgacha pasaydi.
Ushbu davrda Ai-80 markali avtomobil benzinining o‘rtacha haftalik kotirovkasi 6 million 178 ming 200 so‘mni, Ai-91 esa 7 million 679 ming 300 so‘mni tashkil etdi.
Turli manbalarda keltirilishicha, avtomobil benzinining bir tonnasi o‘rtacha 1293—1370 litrni tashkil qiladi.
Ma’lumot uchun, Ai-80 markali avtomobil benzinining narxi 2021-yilning mart oyi boshidan buyon tushib kelmoqda.
Eslatib o‘tamiz, 2020-yil 1-maydan boshlab Ai-80 markali avtomobil benzini va dizel yoqilg‘isi (shu jumladan, EKO markali dizel yoqilg‘isi) chakana narxlarini davlat tomonidan tartibga solish bekor qilindi. Shundan so‘ng 1-maydan dizel yoqilg‘isi narxi 500 so‘mga pasayib, 6500 so‘m qilib belgilangan. 3-maydan boshlab esa Ai-80 benzinining narxi 500 so‘mga pasayib, bir litri 4000 so‘mdan sotila boshlagan. 2020-yilning dekabrida mazkur markadagi benzinning o‘rtacha boshlang‘ich narxi 2,6 foizga ko‘tarilgandi. 2021-yilning yanvar oxirlarida Ai-80 benzini narxi 110 so‘mga qimmatlashishi mumkinligi xabar qilingan.
Izoh (0)