«Ўзбекистон товар-хом ашё биржаси»да Аи-80 маркали бензин нархи тушди

«Ўзбекистон товар-хом ашё биржаси»да 1 тонна Аи-80 маркали бензин арзонлашди, дея хабар бермоқда биржа матбуот хизмати.

Қайд этилишича, 2021 йил 15—21 март кунлари товар-хом ашё биржасига 35 965,0 тонна Аи-80 маркали автомобиль бензини қўйилди ва улардан 14 588,0 тоннаси, яъни 40,6 фоизи сотилди. Ўтказилган савдоларда ҳар куни ўртача 29 харидор иштирок этди.

Кўриб чиқилаётган даврда Аи-80 маркали автомобиль бензинининг ўртача кунлик нархи бир тоннаси учун 6 миллион 287 минг 500 сўмдан 6 миллион 269 минг 700 сўмгача пасайди.

Ушбу даврда Аи-80 маркали автомобиль бензинининг ўртача ҳафталик котировкаси 6 миллион 178 минг 200 сўмни, Аи-91 эса 7 миллион 679 минг 300 сўмни ташкил этди.

Турли манбаларда келтирилишича, автомобиль бензинининг бир тоннаси ўртача 1293—1370 литрни ташкил қилади.

Маълумот учун, Аи-80 маркали автомобиль бензинининг нархи 2021 йилнинг март ойи бошидан буён тушиб келмоқда.

Эслатиб ўтамиз, 2020 йил 1 майдан бошлаб Аи-80 маркали автомобиль бензини ва дизель ёқилғиси (шу жумладан, ЭКО маркали дизель ёқилғиси) чакана нархларини давлат томонидан тартибга солиш бекор қилинди. Шундан сўнг 1 майдан дизель ёқилғиси нархи 500 сўмга пасайиб, 6500 сўм қилиб белгиланган. 3 майдан бошлаб эса Аи-80 бензинининг нархи 500 сўмга пасайиб, бир литри 4000 сўмдан сотила бошлаган. 2020 йилнинг декабрида мазкур маркадаги бензиннинг ўртача бошланғич нархи 2,6 фоизга кўтарилганди. 2021 йилнинг январь охирларида Аи-80 бензини нархи 110 сўмга қимматлашиши мумкинлиги хабар қилинган.