O‘zbekiston Investitsiyalar va tashqi savdo vazirligi (IТSV) tuzilmasida Rossiya bilan hamkorlikni rivojlantirish boshqarmasi tashkil etildi. Bu Prezident Shavkat Mirziyoyevning 15-martdagi “O‘zbekiston Respublikasi va Rossiya Federatsiyasi o‘rtasidagi ko‘p qirrali hamkorlikni yanada rivojlantirish chora-tadbirlari to‘g‘risida”gi qarorida ko‘zda tutilgan, deb xabar bermoqda “Gazeta.uz”.
Hujjat O‘zbekiston va Rossiya o‘rtasidagi siyosiy, savdo-iqtisodiy, investitsiyaviy, moliyaviy-texnik, madaniy-gumanitar sohalaridagi o‘zaro manfaatli, amaliy sheriklikni kengaytirish hamda strategik hamkorlik va ittifoqchilik munosabatlarini sifat jihatidan yangi darajaga ko‘tarish va uni aniq mazmun bilan yanada boyitishni ta’minlash maqsadida qabul qilingan.
Qaror bilan ITSV tuzilmasiga Rossiya bilan tashqi iqtisodiy hamkorlikni rivojlantirish uchun mas’ul bo‘lgan investitsiyalar va tashqi savdo vazirining o‘rinbosari lavozimi kiritildi. Avvalroq ushbu lavozimga Xurram Teshaboyevning tayinlangani haqida xabar qilingan edi. U bir vaqtning o‘zida ITSV huzuridagi Investitsiya loyihalarini ishlab chiqish markazi direktori hisoblanadi (2019-yildan).
Yangi vazir o‘rinbosarining asosiy vazifalari qatoriga Rossiya bilan savdo-iqtisodiy, investitsiyaviy, moliyaviy-texnik hamkorlik loyihalari va dasturlarini ishlab chiqish hamda amalda ro‘yobga chiqarish, Rossiya bilan yuqori texnologiyalar, innovatsiyalar, sanoat, energetika, infratuzilmani rivojlantirish, transport, logistika, qishloq xo‘jaligi, turizm va boshqa yo‘nalishlarda amaliy hamkorlikni kengaytirish bo‘yicha aniq takliflar tayyorlash, shuningdek, ITSV hamda Rossiya Sanoat va savdo vazirligi o‘rtasida yangi sanoat loyihalarini ishlab chiqish va Rossiya tomoni bilan hamkorlikda amalga oshirish maqsadida tashkil etilgan “Loyiha ofisi” faoliyatini muvofiqlashtirish kiritilgan.
Hujjat bilan, shuningdek, “O‘zbekiston bilan Rossiya o‘rtasida savdo-iqtisodiy, investitsiyaviy va moliyaviy-texnik hamkorlik loyihalarini sifatli tayyorlash va amalga oshirish bo‘yicha tizimli ishlarni ta’minlash” maqsadida Moskvada ITSVning xodimlar soni 7 kishidan iborat vakolatxonasini ochish ham ko‘zda tutilgan.
Bundan tashqari, ITSVning Jahon savdo tashkiloti bilan hamkorlik qilish boshqarmasi negizida vazirlikning belgilangan shtatlari doirasida Xalqaro va mintaqaviy tashkilotlar bilan hamkorlik qilish hamda tashqi iqtisodiy integratsiya jarayonlarini muvofiqlashtirish boshqarmasi tashkil qilinadi.
Boshqarmaning yangi vazifalari qatoridan O‘zbekistonning Yevrosiyo iqtisodiy ittifoqi va Jahon savdo tashkilotiga a’zo bo‘lishi bilan bog‘liq masalalarni tahlil qilish va muvofiqlashtirish ham o‘rin olgan.
Izoh (0)