O‘zbekistonda firmalarga davlat tilida nom berish xizmati tashkil etiladi

“Savdo, ishlab chiqarish va xizmat ko‘rsatish obyektlariga nom berishni takomillashtirish chora-tadbirlari to‘g‘risida”gi hukumat qarori qabul qilindi.

Qarorga ko‘ra, Toshkent davlat o‘zbek tili va adabiyoti universiteti huzuridagi Davlat tilida ish yuritish asoslarini o‘qitish va malaka oshirish markazi tomonidan savdo, ishlab chiqarish va xizmat ko‘rsatish obyektlariga davlat tilida nom berish (neyming) xizmati ko‘rsatiladi.

Davlat xizmatlari agentligi bosh yuriskonsulti Kamol Xoliqovning ta’kidlashicha, tadbirkorlik subyektlari faoliyat yuritishi va ta’sis hujjatlarida belgilab olgan maqsadlariga erishishi uchun firma nomini faoliyat turlariga muvofiq tushunarli va xalqchil tilda tanlashi muhim ahamiyat kasb etadi.

Biroq aksariyat hollarda O‘zbekiston fuqarolari ta’sischiligida tashkil etilgan tadbirkorlik subyektlari — yuridik shaxslar boshqa tillardan olingan so‘zlar asosida firma nomini tanlab ro‘yxatdan o‘tish holatlari kuzatilmoqda. Xususan, bugungi kunda Respublika miqyosida group (tarjimasi — guruh) so‘zi ishtirok etgan 8 553 ta, grand (yuqori) so‘zi ishtirok etgan 3 766 ta, golden (oltin) so‘zi ishtirok etgan 1 997 ta, city (shahar) so‘zi ishtirok etgan 1 696 ta mahalliy korxonalar faoliyat yuritib kelmoqda.

Kamol Xoliqovning qayd etishicha, yuqoridagi qarorning qabul qilinishi davlat tilidagi firma nomlarini zaxiraga olishda tadbirkorlik subyektlari uchun keng imkoniyat yaratishi bilan bir qatorda mahalliy korxonalarning firma nomlarini davlat tilida yuritilishini ham ta’minlash imkonini beradi.

Davlat tilida ish yuritish asoslarini o‘qitish va malaka oshirish markazi quyidagi vazifalarni amalga oshiradi:

• davlat tili qoida va me’yorlariga muvofiq keladigan, milliy qadriyatlarga mos hamda obyektlarga qo‘yish tavsiya etiladigan nomlar zaxirasini onlayn rejimida shakllantirish hamda uni doimiy yangilab borish;
• tashqi yozuv, peshlavha, reklama va e’lonlar matnini tayyorlash, shuningdek, ularning davlat tili qoida va me’yorlariga muvofiqligi, nomlarning bir xil yoki o‘xshashlik darajasi yuzasidan lingvistik ekspertiza o‘tkazish;
• obyektlar uchun davlat tilida nomlar yaratish va tanlash bo‘yicha shartnoma asosida xizmatlar ko‘rsatish.