Adliya vazirligi “Qurilish jarayoni ishtirokchilarining mas’uliyati va javobgarligini oshirish, qurilish sohasida nazoratni kuchaytirish va sifatini tubdan yaxshilash chora-tadbirlari to‘g‘risida”gi Prezident farmoni loyihasini muhokamaga qo‘ydi.
Loyihada qayd etilishicha, so‘nggi yillarda mamlakatda qurilish maydoniga aylanib, qurilishni jadallashtirish bo‘yicha kompleks chora-tadbirlar amalga oshirish bilan bir qatorda sohada davlat boshqaruvining samarali mexanizmlari joriy etilmoqda. “Biroq tahlillar qurilish ishlarini amalga oshirish, nazoratini tashkil etish va shaffoflikni ta’minlashda tizimli kamchilik va muammolar mavjudligini ko‘rsatdi”, — deyiladi farmon loyihasida.
Xususan:
- birinchidan, shaharsozlik faoliyatini amalga oshirish sohasidagi ruxsat berish tartib-taomillari mukammal emas, natijada sifatsiz va noqonuniy qurilishlarga yo‘l qo‘yilmoqda;
- ikkinchidan, qurilish obyektida loyiha tashkilotlari tomonidan mualliflik nazoratini olib borish mexanizmi joriy etilmaganligi qurilishda sifatga hamda hamda bino va inshootlarda energiya tejamkorligiga va samaradorligini oshirishda muammolarni keltirib chiqarmoqda;
- uchinchidan, loyihalashtirish uchun loyiha-oldi hujjatlari, jumladan, texnik shartlar, loyihalash uchun texnik topshiriq to‘g‘ri ishlab chiqilmasligi, mualliflik nazorati to‘liq olib borilmasligi oqibatida loyiha hujjatlarining sifati keskin pasayishiga olib kelmoqda;
- to‘rtinchidan, buyurtmachi xizmati uchun haq to‘lash mexanizmi takomillashmagan, ish yuklamalari, moddiy javobgarlik, qurilish-pudrat tashkilotlari xodimlariga qo‘yiladigan talablar mavjud emas;
- beshinchidan, qurilish ishlari ustidan nazorat o‘lchovini amalga oshirish hamda obyektlarda nazorat tizimli ta’minlanmaganligi, shuningdek qurilishni tashkil etish va ishlab chiqarish loyihalarini qurilish jarayoniga joriy qilishning huquqiy mexanizmi mavjud emasligi mas’ullar javobgarligini aniq belgilashga to‘siq bo‘lmoqda;
- oltinchidan, mahalliy hokimiyat va davlat boshqaruv organlari rahbarlarining qurilish jarayoniga asossiz aralashuvi natijasida obyektlarni muddatidan oldin foydalanishga qabul qilish yoki qabul qilishni muhim sanalarini belgilash qurilish jarayoni texnologiyalarini buzilishiga hamda bino va inshootlarning xavfsizlik darajasini kamayishiga hamda asossiz xarajatlarga olib kelmoqda;
- yettinchidan, nazorat qiluvchi organlar tomonidan nazorat inspeksiyasi xodimlarining tizimli tekshirish jarayonlariga mutaxassis sifatida jalb qilinishi soha mutaxassislarining o‘z vazifalarini lozim darajada bajarmasligiga, davlat nazoratini to‘laqonli ta’minlanmasligiga sabab bo‘lmoqda;
- sakkizinchidan, ayrim qurilish obyektlari o‘rnatilgan tartibda foydalanishga qabul qilinmagan bo‘lsada obyektlarni davlat ro‘yxatidan o‘tkazish (mulk huquqi berilishi) holatlariga yo‘l qo‘yilishi oqibatida obyektlardan foydalanuvchilarning haqli e’tirozlariga sabab bo‘lmoqda.
Avvalroq Qurilish vazirligi pudrat tashkilotlarining yangi reyting tizimi haqida ma’lumot bergandi. Shuningdek, qurilishda korrupsiya va qog‘ozbozlikni tugatishi kutilayotgan “Shaffof qurilish” tizimi haqida ma’lumot taqdim etilgandi.
Izoh (0)