Ўзбекистон Инвестициялар ва ташқи савдо вазирлиги (ИТСВ) тузилмасида Россия билан ҳамкорликни ривожлантириш бошқармаси ташкил этилди. Бу Президент Шавкат Мирзиёевнинг 15 мартдаги «Ўзбекистон Республикаси ва Россия Федерацияси ўртасидаги кўп қиррали ҳамкорликни янада ривожлантириш чора-тадбирлари тўғрисида»ги қарорида кўзда тутилган, деб хабар бермоқда «Gazeta.uz».
Ҳужжат Ўзбекистон ва Россия ўртасидаги сиёсий, савдо-иқтисодий, инвестициявий, молиявий-техник, маданий-гуманитар соҳаларидаги ўзаро манфаатли, амалий шерикликни кенгайтириш ҳамда стратегик ҳамкорлик ва иттифоқчилик муносабатларини сифат жиҳатидан янги даражага кўтариш ва уни аниқ мазмун билан янада бойитишни таъминлаш мақсадида қабул қилинган.
Қарор билан ИТСВ тузилмасига Россия билан ташқи иқтисодий ҳамкорликни ривожлантириш учун масъул бўлган инвестициялар ва ташқи савдо вазирининг ўринбосари лавозими киритилди. Аввалроқ ушбу лавозимга Хуррам Тешабоевнинг тайинлангани ҳақида хабар қилинган эди. У бир вақтнинг ўзида ИТСВ ҳузуридаги Инвестиция лойиҳаларини ишлаб чиқиш маркази директори ҳисобланади (2019 йилдан).
Янги вазир ўринбосарининг асосий вазифалари қаторига Россия билан савдо-иқтисодий, инвестициявий, молиявий-техник ҳамкорлик лойиҳалари ва дастурларини ишлаб чиқиш ҳамда амалда рўёбга чиқариш, Россия билан юқори технологиялар, инновациялар, саноат, энергетика, инфратузилмани ривожлантириш, транспорт, логистика, қишлоқ хўжалиги, туризм ва бошқа йўналишларда амалий ҳамкорликни кенгайтириш бўйича аниқ таклифлар тайёрлаш, шунингдек, ИТСВ ҳамда Россия Саноат ва савдо вазирлиги ўртасида янги саноат лойиҳаларини ишлаб чиқиш ва Россия томони билан ҳамкорликда амалга ошириш мақсадида ташкил этилган «Лойиҳа офиси» фаолиятини мувофиқлаштириш киритилган.
Ҳужжат билан, шунингдек, «Ўзбекистон билан Россия ўртасида савдо-иқтисодий, инвестициявий ва молиявий-техник ҳамкорлик лойиҳаларини сифатли тайёрлаш ва амалга ошириш бўйича тизимли ишларни таъминлаш» мақсадида Москвада ИТСВнинг ходимлар сони 7 кишидан иборат ваколатхонасини очиш ҳам кўзда тутилган.
Бундан ташқари, ИТСВнинг Жаҳон савдо ташкилоти билан ҳамкорлик қилиш бошқармаси негизида вазирликнинг белгиланган штатлари доирасида Халқаро ва минтақавий ташкилотлар билан ҳамкорлик қилиш ҳамда ташқи иқтисодий интеграция жараёнларини мувофиқлаштириш бошқармаси ташкил қилинади.
Бошқарманинг янги вазифалари қаторидан Ўзбекистоннинг Евросиё иқтисодий иттифоқи ва Жаҳон савдо ташкилотига аъзо бўлиши билан боғлиқ масалаларни таҳлил қилиш ва мувофиқлаштириш ҳам ўрин олган.
Изоҳ (0)