Farg‘onada Navro‘z saylini tomosha qilayotgan kishining telefoni va pullarini o‘g‘irlagan ikki shaxs qo‘lga olindi. Bu haqda Tergov departamenti xabar berdi.
Ma’lum qilinishicha, 21-mart kuni noma’lum shaxslar Farg‘ona viloyati O‘zbekiston tumani Yaypan shahri markazidagi istirohat bog‘ida xalq saylini tomosha qilayotgan mast holatdagi 31 yoshli A.S.ning qo‘llarini orqaga qayirib, sog‘ligi uchun xavfli bo‘lmagan zo‘rlik ishlatib, cho‘ntagidagi 150 ming so‘mlik Artel telefon apparati va 260 ming so‘m pullarini talonchilik yo‘li bilan qo‘lga kiritib, hodisa joyidan qochib ketgan.
Olib borilgan tergovga qadar tekshiruv harakatlari davomida, ushbu jinoyatni 37 yoshli O.A. va 34 yoshli B.U. mast holatda sodir etgani, o‘g‘irlangan pulga spirtli ichimlik sotib olgani aniqlangan. O‘g‘irlangan telefon apparati esa ashyoviy dalil tariqasida rasmiylashtirib olingan.
Holat yuzasidan O‘zbekiston tumani IIB huzuridagi Tergov bo‘limi tomonidan O.A. va B.U.ga nisbatan Jinoyat kodeksining 166-moddasi (talonchilik) 2-qismi “a, v” bandlari bilan jinoyat ishi qo‘zg‘atilib, protsessual tartibda ushlangan.
Hozirda tergov harakatlari olib borilmoqda.
Departament bu turdagi jinoyatlar uchun Jinoyat kodeksi normalariga ko‘ra, 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi tayinlanishini eslatib o‘tgan.
Avvalroq Andijonda 21 yoshli ayolning sochini zo‘rlik ishlatish yo‘li bilan qirqib tashlab, telefonini o‘marib ketgan yigit hibsga olingani, Farg‘onada ayol kishi o‘zganing uyidan 5000 rubl va 7 million so‘mga yaqin pullarni o‘g‘irlagani aniqlangani, Samarqandda “romantik oqshom” uchun chaqirilgan qizlar o‘smirning uyini to‘nab ketgani hamda Toshkentda sevgan qiziga narsa olib berish uchun telefon o‘g‘irlagan yigit ushlangani haqida xabar berilgandi.
Izoh (0)