Turkiya prezidenti Rajab Toyyib Erdo‘g‘on mamlakat markaziy banki rahbari Nasi Agbalni ishdan bo‘shatib, turk lirasining qadrsizlanishiga sabab bo‘ldi. Bir kun davomida milliy valyuta 14 foizga qadrsizlanib, bir dollar uchun 8,35 liragacha arzonlashdi. Bu haqda BBC nashriga tayanib, “Korrespondent.net” xabar berdi.
Nashrning qayd etishicha, 2018-yilgi valyuta krizisidan keyin turk lirasi o‘zining teng yarim qiymatini yo‘qotgan. Lekin Agbal davrida Turkiya pul birligi rivojlanayotgan bozorlarda eng muvaffaqiyatli valyutaga aylanib ulgurgan edi.
Noyabr oyida tayinlangan Agbal so‘nggi ikki yil ichida Turkiya markaziy bankining uchinchi rahbari bo‘ldi. U 15 foizdan yuqori bo‘lgan inflyatsiyani pasaytirish uchun foiz stavkalarini oshirdi.
Hozir Turkiyada foiz stavkalari 19 foizni tashkil qiladi. Bu xorijiy investorlarni o‘z naqd pullarini turk valyutasida joylashtirishga jalb qildi.
Turkiya Markaziy bankining ta’kidlashicha, “inflyatsiya darajasining doimiy pasayishiga erishish kabi asosiy maqsadga muvofiq, pul-kredit siyosati vositalaridan samarali foydalanishni davom ettiradi”.
Ma’lumot uchun, Markaziy bankning avvalgi rahbarini Erdo‘g‘on 2020-yilning noyabr oyida ishdan bo‘shatgan edi.
Avvalroq Turkiya Yevropa Kengashining ayollarga nisbatan zo‘ravonlikning oldini olish va unga qarshi kurash haqidagi konvensiyasidan chiqishini e’lon qildi. Rajab Toyyib Erdo‘g‘on hujjatni imzolagandan keyin, 20-mart kuni Turkiyada minglab odamlar norozilik namoyishlariga chiqdi va prezidentdan o‘z qarorini bekor qilishni talab qildi. Bunday aksiyalar Istanbul, Anqara va Izmirda bo‘lib o‘tdi.
Izoh (0)