Туркия президенти Ражаб Тоййиб Эрдўғон мамлакат марказий банки раҳбари Наси Агбални ишдан бўшатиб, турк лирасининг қадрсизланишига сабаб бўлди. Бир кун давомида миллий валюта 14 фоизга қадрсизланиб, бир доллар учун 8,35 лирагача арзонлашди. Бу ҳақда BBC нашрига таяниб, «Korrespondent.net» хабар берди.
Нашрнинг қайд этишича, 2018 йилги валюта кризисидан кейин турк лираси ўзининг тенг ярим қийматини йўқотган. Лекин Агбал даврида Туркия пул бирлиги ривожланаётган бозорларда энг муваффақиятли валютага айланиб улгурган эди.
Ноябрь ойида тайинланган Агбал сўнгги икки йил ичида Туркия марказий банкининг учинчи раҳбари бўлди. У 15 фоиздан юқори бўлган инфляцияни пасайтириш учун фоиз ставкаларини оширди.
Ҳозир Туркияда фоиз ставкалари 19 фоизни ташкил қилади. Бу хорижий инвесторларни ўз нақд пулларини турк валютасида жойлаштиришга жалб қилди.
Туркия Марказий банкининг таъкидлашича, «инфляция даражасининг доимий пасайишига эришиш каби асосий мақсадга мувофиқ, пул-кредит сиёсати воситаларидан самарали фойдаланишни давом эттиради».
Маълумот учун, Марказий банкнинг аввалги раҳбарини Эрдўғон 2020 йилнинг ноябрь ойида ишдан бўшатган эди.
Аввалроқ Туркия Европа Кенгашининг аёлларга нисбатан зўравонликнинг олдини олиш ва унга қарши кураш ҳақидаги конвенциясидан чиқишини эълон қилди. Ражаб Тоййиб Эрдўғон ҳужжатни имзолагандан кейин, 20 март куни Туркияда минглаб одамлар норозилик намойишларига чиқди ва президентдан ўз қарорини бекор қилишни талаб қилди. Бундай акциялар Истанбул, Анқара ва Измирда бўлиб ўтди.
Изоҳ (0)