To‘rt yashar qizchani o‘ldirgan o‘zbekistonlik enaga majburiy davolanishdan keyin Rossiyadan chiqarib yuboriladi

2017-yilning yanvarida to‘rt yoshli qizchani o‘ldirgani uchun sudlangan o‘zbekistonlik sobiq enaga Gulchehra Boboqulova majburiy davolanish muddati tugaganidan keyin Rossiyadan chiqarib yuboriladi, deb yozadi Meduza Rossiya Ichki ishlar vazirligiga tayanib.

IIV ma’lum qilishicha, 2017-yilda Boboqulovaning Rossiyada bo‘lib turishi nomaqbul deb topilgan. “Davolanib bo‘lganidan keyin u Rossiyadan tashqariga deportatsiya qilinadi”, — deyiladi IIV xabarida. Ammo sobiq enaganing davo muolajalari qachon yakunlanishiga aniqlik kiritilmagan.

Fevral oyida “Moskovskiy komsomolets” nashri Boboqulova Tataristonning Qozon shahridagi ruhiy shifoxonada ekanini ma’lum qilgandi (bunday ma’lumotlar rasman ma’lum qilinmaydi). Ayolning onasi aytishicha, shifokorlar Boboqulovaning ahvolini barqaror deb baholagan va tegishli hujjatlar kelib tushgach, uni deportatsiya qilishga tayyorligini bildirgan.

Boboqulova tomonidan o‘ldirilgan qizchaning onasi Yevgeniya Meshcheryakova esa sobiq enaga davolanib chiqqanidan keyin oiladan o‘ch olishi mumkinligidan xavotirlangandi.

2016-yilning 29-fevral kuni Moskvada Gulchehra Boboqulova o‘zi qarab turishi kerak bo‘lgan to‘rt yoshli qizchani bo‘g‘ib o‘ldirgan va boshini tanasidan judo qilgan. So‘ng xonadonga o‘t qo‘yib, ko‘chaga chiqib ketgan. U qo‘lida qizchaning boshini ko‘targan holda 20 daqiqacha ko‘chalarni kezib yurgan. “Oktyabrskoye pole” metro bekatiga borib, portlatib yuborish bilan tahdid qilgan. Sudda tergovchilar taqdim etgan ekspertiza natijalariga ko‘ra, Boboqulova shuursizlik holatida (nima qilayotganini o‘zi bilmaydigan holatda) bo‘lib, bungacha O‘zbekistonda shizofreniya kasalligidan davolangan.