Amerikaning Kolorado shtati Boulder shahrida otishma oqibatida o‘n kishi, shu jumladan, bir nafar politsiyachi vafot etdi, deb yozadi “RBK” mahalliy politsiyaga tayanib. Marhum ofitser, politsiyada 2010-yildan buyon ishlab kelgan 51 yoshli Erik Talli voqea joyiga birinchilardan bo‘lib yetib kelgan.
Politsiya aniqlik kiritishicha, avvalroq otishma sodir etishda gumonlanib bir kishi qo‘lga olingan, u yaralangan. Okrug prokurori Maykl Dogerti adolatga erishish qo‘lidan kelgancha harakat qilishga va’da bergan.
22-mart kuni noma’lum shaxs Boulder shahri janubida joylashgan supermarketda otishma boshladi. Guvohlar so‘zlariga ko‘ra, kamida uch marta o‘t ochilgan. OAVlarga ko‘ra, noma’lum shaxs dastlab do‘kon avtoturargohida o‘t ochgan, so‘ng ichkariga kirgan. Halok bo‘lganlardan birining jasadi turargohdan topilgan. U yerda ichida miltiq g‘ilofi bo‘lgan avtomobil ham aniqlangan. Politsiyaga avtoturargohda otilgan o‘q haqida xabar berilgan, u yerga politsiyachilar yetib kelganidan keyin noma’lum shaxs ularni o‘qqa tutgan.
OAVlar keyinroq binodan qo‘liga kishan solingan odam olib chiqib ketilganini ma’lum qilgan, u ustki kiyimsiz va oyoqlari qon holatda bo‘lgan, otishma sodir etgan shaxs shu ekani noma’lum.
Izoh (0)