Turkiya ayollarni zo‘ravonlikdan himoya qilish bo‘yicha Istanbul konvensiyasidan chiqdi

Turkiya Yevropa Kengashining ayollarga nisbatan zo‘ravonlikning oldini olish va unga qarshi kurash haqidagi konvensiyasidan chiqishini e’lon qildi, deb yozadi Meduza mamlakat prezidentining tegishli farmoniga tayanib.

Ayni vaqtda Turkiya vitse-prezidenti Fuat Oktay Anqara ayollar huquqlarini himoya qilishga qaratilgan kurashni davom ettirishini ma’lum qildi.

Rajab Toyyib Erdo‘g‘on hujjatni imzolagandan keyin, 20-mart kuni Turkiyada minglab odamlar norozilik namoyishlariga chiqdi va prezidentdan o‘z qarorini bekor qilishni talab qildi. Bunday aksiyalar Istanbul, Anqara va Izmirda bo‘lib o‘tdi.

Yevroittifoqning tashqi ishlar va xavfsizlik siyosati bo‘yicha oliy vakili Jozep Borrel Turkiyani Istanbul konvensiyasidan chiqish qarorini qayta ko‘rib chiqishga chaqirdi. U Turkiya hukumatining qarori yuzasidan afsus bildirdi va buni tushunmasligini aytdi.

“Ayollar va qizlarga nisbatan zo‘ravonlikka qarshi kurash bo‘yicha ortga chekinish emas, yetakchilik ko‘rsatish vaqti keldi. Shuning uchun biz Turkiya hukumatining hatto Istanbul nomi berilgan ushbu konvensiyadan chiqish qaroriga nisbatan afsus bildirmasdan ilojimiz yo‘q… Biz Turkiyani o‘z qarorini bekor qilishga chaqirmasdan tura olmaymiz”, — deyiladi Borrelning bayonotida.

Ayollar himoyasiga qaratilgan konvensiya 2011-yilda Istanbulda qabul qilingan (shuning uchun u Istanbul konvensiyasi deb ham ataladi) bo‘lib, uydagi zo‘ravonlikka qarshi kurash bo‘yicha Yevropadagi birinchi kelishuvga aylangan. Turkiya mamlakatlar ichida birinchi bo‘lib ushbu hujjatni ratifikatsiya qildi. Konvensiyani 40 dan ortiq mamlakat imzolagan.

Istanbul konvensiyasiga ko‘ra, ruhiy, jismoniy va jinsiy zo‘ravonlik, majburiy tarzda amalga oshirilgan abort, nikoh va sterilizatsiya, shuningdek, jinsiy tegajog‘lik jinoyat hisoblanadi.