So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.
Janubiy Koreya prezidenti Mun Chje In va uning rafiqasi Kim Chjon Suk koronavirusga qarshi emlandi. Ular AstraZeneca Britaniya-Shvetsiya kompaniyasining vaksinasini qabul qildi. Buning uchun er-xotin Seuldagi Chonnogu markazida joylashgan sog‘liqni saqlash jamoatchilik markaziga keldi.
Mun Chje In va birinchi xonim iyun oyida Buyuk Britaniyada bo‘lib o‘tishi kutilayotgan G7 sammitida qatnashish uchun oldindan COVID-19’ga qarshi emlandi. Janubiy Koreyada 23-martdan boshlab 65 yoshdan oshgan odamlar koronavirusga qarshi vaksina oladi.
So‘nggi ma’lumotlarga ko‘ra, mamlakatda 99,4 mingdan ortiq odam COVID-19’ga chalingan, shularning 1,7 mingdan ortig‘i vafot etgan.
Mart boshida Mun Chje In koronavirusga qarshi urush boshlanganini e’lon qilgan edi. U mansabdorlardan shay holatda bo‘lishni talab qilgan va aholini niqoblar bilan ta’minlashga va’da bergan edi. Virusga qarshi kurashga hukumat 30 trillion von (25 million dollar) yo‘naltirmoqchi.
Janubiy Koreyada AstraZeneca vaksinasi fevral boshida ma’qullangan.
Shu bilan birga, Litva prezidenti Gitanas Nauseda ham AstraZeneca kompaniyasi vaksinasi bilan omma oldida emlandi.
“Men haqiqatan ham allaqachon ma’qullangan to‘rtta vaksinaning barchasi ishonchli va samarali deb hisoblayman. Shuning uchun odamlarni vaqtni bekor sarflamasdan, kutmasdan va o‘ylamasdan o‘zlari xohlagan vaksina bilan emlanishga chaqiraman”, — dedi u jurnalistlarga emlanib bo‘lganidan keyin.
Shuningdek, Litva bosh vaziri Ingrida Shimonite, seym spikeri Viktoriya Chmilite-Nilsen, sog‘liqni saqlash vaziri Arunas Dulkis ham AstraZeneca vaksinasini qabul qilishi kutilmoqda.
Litva 19-mart kuni Yevroittifoqning ba’zi mamlakatlari bilan bir qatorda AstraZeneca bilan emlashni qayta boshlagan edi.
Germaniya kansleri Angela Merkel mamlakatda karantin 18-aprelgacha uzaytirilishini ma’lum qildi. Pasxa bayramida yanada qat’iyroq cheklovlar joriy qilinadi. Mamlakatda karantin noyabr boshida, qat’iy cheklovlar esa 16-dekabrda kiritilgan edi. Karantin orqali hukumat COVID-19’ning uchinchi to‘lqinini tiyib turmoqchi. “Biz hozir juda jiddiy vaziyatdamiz”, — dedi Merkel matbuot anjumanida.
Besh kun mobaynida — 1—5-aprel kunlari mamlakatda deyarli barcha do‘konlar yopiq bo‘ladi. Diniy ibodatlar onlayn rejimga o‘tkaziladi. 3-aprel, shanba kuni faqat oziq-ovqat do‘konlari ishlaydi. Bundan tashqari, kasallanganlar soni ketma-ket uch kun davomida har 100 ming aholiga 100 kishidan oshgan hududlarda yanada qat’iyroq qoidalar qo‘llaniladi.
Germaniya mart oyida cheklovlarni susaytirishni boshlagan edi, ammo koronavirusning yuqumliroq mutatsiyalari aholi orasida tez tarqalib ketdi.
Yoshlarni koronavirusga qarshi emlayotgan mamlakatlar buni boshqa mamlakatlarning xavf guruhidagi fuqarolari hisobiga amalga oshirilmoqda, dedi Jahon sog‘liqni saqlash tashkiloti (JSST) rahbari Adanom Gebreyesus 22-mart kuni o‘tkazilgan brifingda.
“Ayni paytda yosh va sog‘lom odamlarni emlayotgan mamlakatlar buni boshqa mamlakatlardagi sog‘liqni saqlash ishchilari, keksalar va xavf guruhiga kiruvchi boshqa shaxslar hayoti hisobiga amalga oshirmpqda”, — dedi u.
Gebreyesusning aytishicha, dunyo “halokatli ma’naviy jarlik”ka qulamoqda, chunki COVAX xalqaro mexanizmi orqali vaksinalarni olayotgan kambag‘al mamlakatlarda va boy davlatlarda COVID-vaksinatsiya sur’atlari o‘rtasidagi farq tobora kattalashib bormoqda.
Uning ta’kidlashicha, bunday vaziyatga duch kelmaslik mumkin edi, ammo hukumatlar buning uchun yetarli harakat qilmadi.
Shuningdek, JSST rahbari koronavirusga qarshi vaksinaning tengsizlik bilan taqsimlanishi har bir mamlakatda ham iqtisodiy, ham epidemiologik nuqtai nazardan mag‘lubiyatga olib kelishini eslatdi.
Shuningdek:
- Isroilda 22-mart holatiga aholining yarmi — 50,2 foizi to‘liq (ikkita dozada) koronavirusga qarshi emlandi. Mamlakatda jami 9 711 316 ta emlash amalga oshirilgan. Bitta dozada vaksina olganlar ulushi esa 57,1 foizni tashkil etmoqda.
- Norvegiyada AstraZeneca vaksinasini olgan yana ikki kishi vafot etdi. O‘lim holatlari vaksina bilan bog‘liq bo‘lishi mumkinligi istisno qilinmayapti. Avvalroq vaksinatsiyadan keyin besh kishi kasalxonaga yotqizilgan. Ularda tromboz, qon quyilishi va trombotsitlarning kam miqdori aniqlangan. Ulardan biri o‘tgan hafta boshida vafot etgan, endi esa yana ikkita o‘lim qayd etilgan.
- Rossiyaning “Sputnik V” vaksinasini ma’qullagan davlatlar soni 55 taga yetdi. Mavrikiya hozircha oxirgi bo‘lib undan foydalanishga ruxsat berdi.
Izoh (0)