Buxoro viloyati transport boshqarmasi jamoat transportlari va yo‘nalishsiz taksilarda niqobsiz harakatlanish man etilishi, tartibga rioya qilmaganlarga nisbatan qat’iy choralar qo‘llanilishini ma’lum qildi.
Boshqarma fuqarolarni jamoat transportlari va yo‘nalishsiz taksilar xizmatlaridan foydalanganda Respublika maxsus komissiyasi tomonidan belgilangan karantin qoidalariga qat’iy rioya etishga, niqob taqish hamda jamoat transportlari salonida ijtimoiy masofani saqlashga chaqirgan.
“Tajribadan kelib chiqqan holda faqatgina ijtimoiy masofaga va majburiy niqob taqish rejimiga qat’iy rioya qilinishi kasallanish tarqalishining oldini olishga yordam beradi. Infeksiya tarqalishiga qarshi birgalikda kurashish, unga qarshi mustahkam turish maqsadida fuqarolarni yuqorida aytib o‘tilgan talablarga so‘zsiz va qat’iy amal qilishga chaqiramiz”, — deyiladi xabarda.
Shuningdek, joylarda haydovchilar bilan karantin qoidalariga rioya etish, harakat xavfsizligini ta’minlash, tibbiy niqobsiz yo‘lovchilarni tashimaslik masalalarida ko‘rsatma va tushuntirishlar berilgani qayd etilgan.
Avvalroq Qashqadaryoda jamoat transportida niqobsiz yurish taqiqlangani haqida xabar berilgan edi. Toshkentda ham “karantin talablariga rioya qilish” nazoratga olinib, yo‘lovchilarning niqob taqishi majburiy etib belgilangan. Adliya vazirligi jamoat joylarida tibbiy niqobsiz yurganlik uchun jarima borligini eslatib o‘tgan.
Izoh (0)