Toshkentdagi Abdulla Qodiriy bog‘ida Hampton by Hilton mehmonxonasi quriladi. 20-mart kuni Hampton by Hilton Tashkent Park Abdula Kodiri nomlanuvchi ushbu mehmonxona poydevoriga vaqt kapsulasini qo‘yish tantanali marosimi bo‘lib o‘tdi, deb xabar bermoqda poytaxt hokimligi matbuot xizmati.
Abdulla Qodiriy istirohat bog‘i hududida mehmonxona qurilishi haqida 2019-yilning noyabrida ma’lum bo‘lgandi. O‘shanda Toshkent shahar hokimligi bu borada yapon kompaniyasi bilan kelishuvga erishilganini bildirgandi. Ushbu qaror ijtimoiy tarmoqlarda keng muhokamalarga sabab bo‘lgan, aksariyat ijtimoiy tarmoq foydalanuvchilari ushbu qarorni qoralagandi.
Poytaxt hokimligi matbuot xizmati xabarida quruvchi va investori sifatida Qozog‘istonning BI Group kompaniyasi ko‘rsatilgan bo‘lib, investitsiyalar miqdori 100 milliard so‘mdan ortiqni tashkil qiladi. Mehmonxonadan 120 xona va biznes-markaz o‘rin oladi. Loyiha 2021-yilning may oyida boshlanib, 2022-yil iyun oyida foydalanishga topshiriladi.
Mehmonxona poydevoriga vaqt kapsulasini qo‘yish tantanali marosimida Toshkent shahar hokimining o‘rinbosari — Investitsiya va tashqi savdo boshqarmasining boshlig‘i Sharof Rahmonov, Olmazor tumani hokimi Abdumajid Mullajonov, Murad buildings asoschisi Murod Nazarov va BI Group kompaniyasi vakillari — Qozog‘istonning O‘zbekistondagi elchixonasi maslahatchi-elchisi Qanat Hasenov va BI Group direktorlar kengashining raisi Aydin Rahimbayev ishtirok etgan.
Yanvar oyida Toshkent markazida boshqa Hampton by Hilton mehmonxonasi qurilayotgani haqida xabar berilgan edi. Mehmonxona endi qurilayotganiga qaramay, unga oid ma’lumot “Yandek.Xarita”da paydo bo‘lgan. Obyekt Istiqbol ko‘chasida, KFC restorani yonida, Xalqaro Vestminister universiteti ro‘parasida joylashgan.
Ma’lumot uchun, BI Group — innovatsion qurilish xoldingi Qozog‘iston ko‘chmas mulk bozorida yetakchi bo‘lib, o‘z faoliyatini 1995-yildan amalga oshirib kelmoqda. Dunyoning eng yirik qurilish kompaniyalari ENR Top 250 Global Contractors reytingiga kiradi.
Hampton by Hilton Tashkent Park Abdula Kodiri — BI Group va Hilton Worldwide’ning to‘rtinchi qo‘shma loyihasidir.
O‘tgan yil davomida BI Group xoldingi tomonidan Hilton Worldwide bilan Markaziy Osiyoda 10 ta Hampton by Hilton mehmonxonalarini qurish bo‘yicha kelishuv imzolandi, ulardan biri Toshkentdagi mehmonxona bo‘ladi.
Izoh (0)