Samarqand viloyati hududida 20-mart kuni kuzatilgan yog‘ingarchilik qator noqulayliklar keltirib chiqardi, deb yozmoqda Zarnews.
Qayd etilishicha, ko‘chalardagi suv o‘tkazish tarmoqlariga turli chiqindilar tiqilib qolgani tufayli ayrim ko‘chalar suvga to‘lgan. Ularni o‘z vaqtida bartaraf etish maqsadida viloyat favqulodda vaziyatlar boshqarmasi kuchaytirilgan tartibda xizmat olib borgan.
Xususan, boshqarma tuzilmalari tomonidan Samarqand shahridagi Amir Temur, Go‘ro‘g‘li, Matonat, Gulobod, Muqimiy, Mirsaid Baraka, Bedil ko‘chalari, shuningdek, Kattaqo‘rg‘on shahridagi Bobur ko‘chasi 3-uy, Kattaqo‘rg‘on tumanidagi Mustaqillik ko‘chasi, Ishtixon tumani markazidagi ko‘chalarda kuzatilgan bu kabi suv chiqib ketish holatlari bartaraf etilgan.
Shuningdek, viloyat Favqulodda vaziyatlar boshqarmasi xabariga ko‘ra, Samarqand shahridagi Kurchatova ko‘chasi, xalq orasida “Makaronka” nomi bilan ataladigan ko‘chaga yomg‘ir suvlari toshib ketmasligi bo‘yicha viloyat va shahar hokimligi, FVB, IIB, Suv xo‘jaligi va Obodonlashtirish boshqarmasi bilan birgalikda ayrim noto‘g‘ri qurilmalarni buzdirish va bu bilan Siyobcha arig‘ining suv o‘tkazish imkoniyatini oshirish choralari ko‘rilgan.
Eslatib o‘tamiz, “O‘zgidromet” 20-mart kuni O‘zbekistonning bir qator viloyatlarida yomg‘ir yog‘ishini, ayrim joylarda kuchli bo‘lishini ma’lum qilgandi.
Izoh (0)