Shavkat Mirziyoyev Toshkentdagi Humo Arena majmuasida 21-mart kuni Navro‘z bayramiga bag‘ishlangan tantanali marosimda ishtirok etib, O‘zbekiston xalqini Navro‘z bayrami bilan tabriklab, ezgu tilaklar bildirgandi. Prezident matbuot xizmatining xabar berishicha, marosimdan so‘ng davlat rahbari bayram saylida ishtirok etdi.
Davlat rahbari sayilga kelgan odamlar bilan suhbatlashib, ularni tabriklagan.
“Nuroniylar Allohdan bayram qutlug‘ kelib, hosillar mo‘l, rizq-u nasibamiz ko‘p bo‘lishini, yanagi Navro‘zlarga tinchlik-farovonlikda yetkazishini so‘rab duolar qildi. Davlat rahbari milliy madaniyat markazlari, folklor-etnografik jamoalar chiqishlarini kuzatdi. Yosh ijrochilarga doim o‘qish va izlanishda bo‘lish kerakligini ta’kidlab, ijodiy muvaffaqiyatlar tiladi”, — deyiladi matbuot xizmati xabarida.
Navro‘z sayillari Qoraqalpog‘iston Respublikasi va viloyatlarda, qishloq va mahallalarda davom etmoqda.
Eslatib o‘tamiz, koronavirus pandemiyasini inobatga olgan holda O‘zbekistonda Navro‘z umumxalq bayrami tadbirlari karantin qoidalariga amal qilgan holda mahallalarda tashkil etilmoqda.
Izoh (0)