Norvegiya politsiyasi mamlakat bosh vaziri Erna Sulbergga nisbatan tergov ishlarini boshladi, hukumat rahbari koronavirusga qarshi cheklovlarni buzganlikda ayblanmoqda. Bu haqda The Guardian xabar qildi.
Fevral oxirida Sulberg qarindoshlari bilan birgalikda tog‘-chang‘i kurortida ikki oqshom ketma-ket 60 yillik yubileyini nishonlagan. Birinchi kuni uning 13 nafar mehmoni bosh vazirsiz kechki ovqat tanovul qilgan, Sulberg bu vaqtda shifokor ko‘rigida bo‘lgan, ertasi kuni esa bosh vazir hamda uning mehmonlari ijaraga olingan kvartirada bayramni davom ettirgan.
Norvegiyada yopiq binolarda 10 nafardan ortiq odamning to‘planishi taqiqlab qo‘yilgan va ayni kunlarda ham mazkur cheklov amal qilmoqda.
Sulbergning o‘zi sodir bo‘lgan voqea uchun uzr so‘ragan va qoidalarni diqqat bilan kuzatmaganligini aytib o‘tgan. U cheklovlar bir oila a’zolariga taalluqli emas deb hisoblaganini qayd etgan.
Avval Norvegiyada tibbiyot xodimi AstraZeneca vaksinasi bilan emlanganidan keyin vafot etgani, Daniya, Norvegiya, Islandiya va Italiya AstraZeneca vaksinasi bilan emlashni to‘xtatgani, bunga tromblar paydo bo‘lishi holatlari sabab ekanligi haqida xabarlar berilgan. Fevral oyida Norvegiyada koronavirusning yangi shtammi aniqlangan.
Izoh (0)