Sankt-Peterburgning Frunzenskiy tuman sudi hukumat vakiliga qarshi kuch ishlatishda aybdor deb topilgan O‘zbekiston fuqarosi R.J.ga hukm e’lon qildi. Bu haqda Piter.TV shahar sudlarining birlashgan matbuot xizmatiga tayanib xabar berdi.
Ma’lum bo‘lishicha, 2020-yilning noyabr oyida soat 00:10 dan 02:50 gacha bo‘lgan vaqt oralig‘ida “Mejdunarodnaya” metro bekati vestibyulida o‘zbekistonlik R.J. mast holda aniqlangan.
Politsiya xodimlari unga murojaat qilib, jamoat joyida mast bo‘lganligi uchun hibsga olishini aytgan. Shu vaqt R.J. politsiyachilarga hujum qilib, qo‘l ko‘targan.
Mast erkak huquqni muhofaza qilish organlari xodimlarining boshi, tanasi va oyoqlariga qo‘llari bilan bir necha bor zarba bergan, ammo politsiyachilar tezda R.J.ning qo‘llarini qayirib, vaqtincha hibsda saqlash xonasiga olib kirgan.
U yerda R.J. politsiya xodimasini kameraning panjarasiga itarib yuborgan. Ayol tanasi va boshini to‘siqqa urib, polga yiqilib tushgan. R.J. fursatdan foydalanib, yana vestibyulga qarab yugurgan. Erkakning ortidan yetib olgan politsiyachi uni qayta qo‘lga olgan.
Sudda R.J. aybiga iqror bo‘lib, qilmishiga pushaymon bo‘lgan. Shuningdek, u jabrlanuvchilardan kechirim so‘ragan. Sud bu odam ro‘yxatdan o‘tmagani, muqaddam sudlanmagani va o‘z mamlakati tomonidan ijobiy xarakterlanganini hisobga olib, unga nisbatan koloniyada 10 oylik qamoq jazosi va 120 ming rubl miqdoridagi ma’naviy zararni qoplash tayinlagan.
Bundan avval O‘zbekistonda qidiruvda bo‘lgan shaxs Rossiyada qo‘lga olingani, Sankt-Peterburgda ikki moskvalik O‘zbekiston fuqarosiga hujum qilgani uchun besh yillik qamoq jazosiga hukm qilingani hamda Sankt-Peterburgda 29 yoshli o‘zbekistonlik ayol o‘ldirib ketilgani, qotillikda 22 yoshli o‘zbekistonlik yigit gumonlanib, qo‘lga olingani xabar berilgandi.
Izoh (0)