Yamanning “Ansar Alloh” (xusiylar) isyonchilar harakatining rasmiy vakili, boshqaruvchi general Yahyo Sariya xusiylarning Saudiya Arabistoni hududiga zarba berganini ma’lum qildi. Bu haqda uning Almasirah telekanalida keltirilgan bayonotiga tayanib, “TASS” xabar berdi.
Generalning so‘zlariga ko‘ra, Saudi Aramco neft kompaniyasining obyektlari o‘qqa tutilgan. Ta’kidlanishicha, zarbalar oltita dron yordamida amalga oshirilgan va “nishonlarga yuqori aniqlik bilan zarba berilgan”. Sariyaning qo‘shimcha qilishicha, xusiylar “Yamanga qarshi blokada va tajovuz davom etar ekan, o‘zlarining harbiy harakatlarini davom ettirish niyatidan qaytmaydi”.
Saudiya Arabistoni Ar-Riyoddagi neftni qayta ishlash zavodiga uyushtirilgan mazkur hujumni tasdiqladi.
“Ar-Riyod yaqinidagi Saudi Aramco neftni qayta ishlash zavodiga 19-mart, juma kuni ertalab uchuvchisiz samolyotlar hujumi uyushtirildi va yong‘in kelib chiqdi”, — deb xabar berdi amirlikning Energetika vazirligi xodimiga asoslanib, SPA matbuot agentligi.
Xabarga ko‘ra, hujum oqibatida hech kim qurbon bo‘lmagan. Shuningdek, hodisaning neftni qabul qilish va neft mahsulotlarini yetkazib berish ishlariga ta’siri yo‘q. Yong‘in ham nazoratga olingan, deya qo‘shimcha qildi agentlik.
2020-yilning noyabr oyida ham xusiylar Saudi Aramco neft kompaniyasiga raketa bilan hujum uyushtirgan edi. Saudiya Arabistonida faoliyat olib boruvchi chet el kompaniyalari ehtiyot bo‘lishi kerak, chunki bunday operatsiyalar hali davom etadi, degan edi xusiylar. O‘sha paytda Saudiya Arabistoni raketa zarbasi haqidagi bayonotni tasdiqlamagan.
Isyonchi xusiylar va Yaman prezidenti Mansur Hodiy armiyasi o‘rtasidagi qurolli mojarolar 2014-yildan beri davom etmoqda. Ziddiyat 2015-yilning martida mamlakatda Saudiya Arabistoni boshchiligidagi koalitsiya kuchlari kirib kelganidan so‘ng kuchaygan.
Eslatib o‘tamiz, 2020-yilning yanvar oyida xusiylar 2019-yilning sentabrida Saudiya Arabistonidagi Saudi Aramco neftni qayta ishlash obyektlariga raketa zarbalarini amalga oshirganini tan olgandi. Natijada mamlakatda neftni ishlab chiqarish ikki baravarga qisqargan. Biroq AQSh bunda Eronni ayblagan. Keyinroq BMT ham Saudi Aramco’ga uyushtirilgan hujumga xusiylarning aloqasi yo‘qligini ma’lum qilgandi.
Izoh (0)