Норвегияда коронавирусга қарши чекловларни бузгани учун бош вазирга қарши тергов ишлари бошланди. У туғилган кунида 13 кишини меҳмон қилган

Норвегия полицияси мамлакат бош вазири Эрна Сульбергга нисбатан тергов ишларини бошлади, ҳукумат раҳбари коронавирусга қарши чекловларни бузганликда айбланмоқда. Бу ҳақда The Guardian хабар қилди.

Февраль охирида Сульберг қариндошлари билан биргаликда тоғ-чанғи курортида икки оқшом кетма-кет 60 йиллик юбилейини нишонлаган. Биринчи куни унинг 13 нафар меҳмони бош вазирсиз кечки овқат тановул қилган, Сульберг бу вақтда шифокор кўригида бўлган, эртаси куни эса бош вазир ҳамда унинг меҳмонлари ижарага олинган квартирада байрамни давом эттирган.

Норвегияда ёпиқ биноларда 10 нафардан ортиқ одамнинг тўпланиши тақиқлаб қўйилган ва айни кунларда ҳам мазкур чеклов амал қилмоқда.

Сульбергнинг ўзи содир бўлган воқеа учун узр сўраган ва қоидаларни диққат билан кузатмаганлигини айтиб ўтган. У чекловлар бир оила аъзоларига тааллуқли эмас деб ҳисоблаганини қайд этган.

Аввал Норвегияда тиббиёт ходими AstraZeneca вакцинаси билан эмланганидан кейин вафот этгани, Дания, Норвегия, Исландия ва Италия AstraZeneca вакцинаси билан эмлашни тўхтатгани, бунга тромблар пайдо бўлиши ҳолатлари сабаб эканлиги ҳақида хабарлар берилган. Февраль ойида Норвегияда коронавируснинг янги штамми аниқланган.